एउटै वार्ता टोली बनाउन सकेनन् जेनजीले, अन्तरिम सरकार प्रमुख र्‍याण्डम नेपाली वा सुशीला कार्कीलाई बनाउनुपर्ने मत

काठमाण्डौ । जेनजीले नेपाली सेनासँग निर्णायक वार्तामा बस्नका लागि एउटै वार्ता टोली बनाउन, अन्तरिम सरकारको नेतृत्व कसले गर्ने भन्ने विषय टुंग्याउन र जेनजीको नेतृत्व कसले गर्ने भन्ने विषयमा निश्कर्ष निकाल्न नसकेपछि अन्यौल बढेको छ ।  

जेनजी नामको आन्दोलनमा सहभागी दर्जनौ समूहहरुले आफूहरु आधिकारिक समूह भएको दाबी गर्दै नेपाली सेनासम्म छलफलका लागि प्रस्तावहरु पुर्याएका छन् । यो क्रममा केही समूहको संयोजनमा देशभरका जेनजीहरुलाई समेटेर भर्चुअल बैठक पनि भएका छन् । तर ती बैठकबाट समेत जेनजीहरुको माग र त्यसलाई टुंगोमा पुर्याउने नेतृत्वको विषयमा कुनै छिनोफानो भएको छैन । जसका कारण नेपाली सेनाले पनि छुट्टा छुट्टै रुपमा वार्ता गर्न पुगेका जेनजी प्रतिनिधिलाई मिलेर आउन र केही दलको नामै तोकेर तिनीहरुका प्रतिनिधि पनि समेटेर आउनु भन्ने निर्देशन दिएको विषय बाहिरिएपछि अन्यौल थप बढेको छ । 

आफूलाई जेनजी तर्फबाट एक वार्ताकार बताउने रक्षा बमले सामाजिक सञ्जालमा एक स्टाटस सार्वजनिक गर्दै नेपाली सेनाका प्रमुखले यो आन्दोलनका स्टेकहोल्डर दुर्गा प्रसाईं र रवि लामिछाने पनि हुन्, उनीहरुसँग पनि वार्ता गरेर आउनु भनेपछि कुरा नमिलेको विषय सार्वजनिक गरेकी छिन् । यो विषयले राजनीतिमा नयाँ तरंग पैदा गरिदिएको छ । सेनापतिसँगको छलफलमा राप्रपाको कुरा समेत उठेकोले कतै अहिलेको लोकतान्त्रिक व्यवस्था नै खतरामा पार्न खोजिएको त होइन भन्ने सशंय उठेको चर्चा व्यापक बनेको छ ।  

अन्य जेनजीहरुले भने आफ्नो नेतृत्व छान्ने काम भइरहेको र अजेण्डाहरु समेत तय भइरहेको बताएका छन् ।  

अन्तरिम सरकार प्रमुखको विषयमा मत सर्वेक्षण

यसैबीच, जेनजी समूहले अन्तरिम सरकारको नेतृत्व कसले गर्ने भन्ने विषयमा समेत सर्वेक्षण गरेका छन् । जसमा सर्वोच्च अदालतकी पूर्व प्रधानन्यायाधीश सुशीला कार्कीको पक्षमा निकै राम्रो मत प्राप्त भएको छ । 

यस्तै, उच्च अदालतका एक वकिल तिमिल्सिना थरका र्‍याण्डम नेपाली भनेर चिनाउनेको पक्षमा भने सुशीला कार्कीको भन्दा पनि बढी मत आएको छ । ३७ प्रतिशत जेनजीले र्याण्डम नेपाली(राष्टविमोचन तिमिल्सिना)लाई अन्तरिम सरकारको नेतृत्व दिनुपर्ने बताएका छन् भने ३४ प्रतिशतले सुशीला कार्कीलाई ।  

हर्क साम्पांगको पक्षमा ६ प्रतिशत, सागर ढकालको पक्षमा १४ प्रतिशत, महावीर पुनको पक्षमा ४ प्रतिशतले मत खसालेका छन् ।  

यो प्रक्रियामा ७ हजार ७११ जेनजीहरुले मत हालेका थिए ।