उत्पादनमूलक कम्पनीहरुको रिपोर्टः वित्तीय अवस्थामा जुन कमजोर उसकै सेयरभाउ उच्च, लो क्यापले उचालिँदै मूल्य

काठमाण्डौ । उत्पादन तथा प्रशोधन समूहका कम्पनीहरुले वित्तीय विवरणमा सुधार ल्याएका छन् । विशेषगरी यो समूहमा पर्ने सिमेन्ट उद्योगहरुले आम्दानीसँगै नाफामा राम्रै सुधार गरेका छन् ।

उत्पादन तथा प्रशोधन समूहमा कुल १३ कम्पनी छन्, जसमध्ये ४ वटा मात्रै सिमेन्ट उद्योग छन् भने अन्य व्यापार समूहका कम्पनीहरु समावेश छन् ।

चालु आवको दोस्रो त्रैमाससम्म चारवटै सिमेन्ट कम्पनीले वित्तीय अवस्था सुधारेका छन् । सो अवधिसम्म सबैभन्दा बढी सर्वोत्तम सिमेन्टले ५३ करोड ८३ लाख रुपैयाँ नाफा कमाएको छ । यो नाफा गत आवको तुलनामा १२३।०१ प्रतिशत बढी हो ।

सर्वोत्तमले कमाएको यो नाफा उत्पादन तथा प्रशोधन समूहका कम्पनीहरुमध्येकै सर्वाधिक हो ।

त्यस्तै, शिवम् सिमेन्ट्सले पनि ५२८.५२ प्रतिशतले नाफा बढाएको छ । कम्पनीले दोस्रो त्रैमाससम्म ३५ करोड ७० लाख रुपैयाँ नाफा कमाएको छ ।

सिमेन्ट उद्योगअन्तर्गतकै अर्को कम्पनी सोनापुर मिनरल्स आयलले भने ४ करोड ७५ लाख रुपैयाँ नाफा कमाएको छ । कम्पनीले गत आवको दोस्रो त्रैमाससम्म १२ करोडढ २० लाख रुपैयाँ घाटा ब्यहोरेको थियो ।

यता घोराही सिमेन्टले भने घाटा कम गरेको छ । गत आवको दोस्रो त्रैमाससम्म ६६ करोड ७१ लाख रुपैयाँ घाटा ब्यहोरेको यो कम्पनीले यस अवधिसम्म आइपुग्दा २६ करोड ४९ लाख रुपैयाँ मात्रै घाटा ब्यहोरेको छ ।

यसरी सिमेन्ट कम्पनीहरुले आफ्नो वित्तीय अवस्था सुधारेको देखिएको छ । यो समूहअन्तर्गत दोस्रो बढी नाफा कमाउनेमा भने हिमालयन डिष्टिलरी रहेको छ । यो कम्पनीले ४४ करोड ८३ लाख रुपैयाँ नाफा कमाएको छ ।

त्यस्तै, युनिलिभर नेपालले ४३ करोड ९ लाख, रिलायन्स स्पिनिङ मिल्सले १३ करोड ७४ लाख, बोटलर्स नेपाल (तराई) लिमिटेडले १३ करोड ५४ लाख, बोटलर्स नेपाल (बालाजु) लिमिटेडले ३ करोड १२ लाख, श्रीनगर एग्रिटेक इन्डस्ट्रिजले १ करोड ५६ लाख र एसवाई प्यानल लिमिटेडले ७८ लाख रुपैयाँ नाफा कमाएको छ ।

सो अवधिसम्म सागर डिष्टिलरी २ करोड ६१ लाख, ओम मेगाश्री फर्मास्युटिकल्सले ३ करोड ८४ लाख र घोराही सिमेन्टले २६ करोड ४९ लाख रुपैयाँ घाटा ब्यहोरेको छ ।

उत्पादन तथा प्रशोधन समूहअन्तर्गतका यी कम्पनीहरुमा युनिलिभर नेपाल र बोटलर्स नेपालका दुईवटै कम्पनीको कारोबारमा आउने सेयर कित्ता निकै कम छ । जसअनुसार यी तीनवटै कम्पनीको सेयरभाउ अत्यधिक र कारोबार समेत दोस्रोबजारमा हुँदैन ।

उक्त तीन कम्पनीबाहेक अन्य कम्पनीलाई हेर्दा जुन कम्पनीको वित्तीय अवस्था कमजोर छ, त्यहि कम्पनीकै सेयरभाउ भने उच्च देखिएको छ । जसमा सर्वाधिक सेयरभाउ सागर डिष्टिलरीको करिब २ हजार रुपैयाँ आसपास छ, तर कम्पनीको वित्तीय अवस्था केलाउने हो भने सिमेन्ट कम्पनीहरुको तुलनामा नाजुक नै देखिन्छ ।

कम्पनीले सो अवधिसम्म साढे २ करोड रुपैयाँ घाटा ब्यहोर्दा यता इपीएस पनि ७.२१ रुपैयाँ ऋणात्मक छ ।

त्यस्तै, एसवाई प्यानलको अवस्था पनि त्यस्तै देखिन्छ । कम्पनीको वित्तीय अवस्था सन्तोषजनक नभएपनि सेयरभाउ भने १९ सय रुपैयाँमाथि छ । यहि समूहकै सिमेन्ट कम्पनीहरुको तुलनामा कम्पनीको नाफा, आम्दानी र इपीएसको अवस्था कम छ तर सेयरभाउ भने अप्रत्यासित रुपमा बढी देखिन्छ । कम्पनीको इपीएस जम्मा १.६५ रुपैयाँ छ ।

यता श्रीनगर एग्रिटेक इन्डस्ट्रिजको रिर्पोट ठिकठिकै देखिएपनि सेयरभाउ १३ सय रुपैयाँमाथि छ भने इपीएस जम्मा १.०३ रुपैयाँ छ ।

साथै १३ सय रुपैयाँ सेयरभाउ रहेको ओम मेगाश्री फर्मास्युटिकल्सको रिर्पोट दयनिय अवस्थामा नै छ । कम्पनीले सो अवधिसम्म ३ करोड ८४ लाख रुपैयाँ घाटा ब्यहोरेको छ । इपीएस समेत १२.८१ रुपैयाँ ऋणात्मक अवस्थामा छ ।

लो क्यापको कारण सेयरभाउ उचालिदै

पछिल्लो समय धितोपत्र दोस्रो बजारमा लगानीकर्ताहरु लो क्याप वा मिड क्याप कम्पनीतर्फ बढी आकर्षित छन् । विशेषगरी बजारमा ट्रेडरहरु हाबी भएका कारण कम्पनीको वित्तीय अवस्था केलाउन भन्दा लो क्याप कम्पनीतर्फ आँखा चिम्लिएरै हाम फालिहाल्ने प्रवृत्ति छ ।

यस्तो अवस्थाले पछिल्लो समय बजारको स्थायित्वमा ठेस पुग्नुका साथै बजारको स्वस्थता हराउँदै गएको छ ।

उत्पादन तथा प्रशोधन समूहका कम्पनीहरुको अवस्था अहिले त्यस्तै देखिखएको छ । वित्तीय अवस्था राम्रा कम्पनीहरुको सेयरभाउ बढ्न नसक्नु र वित्तीय रुपमा कमजोर तर थोरै सेयर कित्ता भएका कम्पनीहरुको सेयरभाउ पनि उचालिँदै गएको छ ।

जम्मा १४ लाख  ५२ हजार कित्ता कारोबारमा आउने भएकाले नै सागर डिष्टिलरीको सेयरभाउ अप्रत्यासित रुपमा बढाइएको स्पष्ट देखिन्छ । यसका साथै लो क्याप वा मिड क्यापमै गनिने ओम मेगाश्री फर्मास्युटिकल्सको पनि जम्मा १८ लाख कित्ता सेयर मात्रै कारोबारमा आउँछ । तर कम्पनीको वित्तीय अवस्था ऋणात्मक देखिन्छ भने सेयरभाउ भने १३ सय रुपैयाँ छ ।

यता सेयरबजारमा अहिले ‘हट केक’को रुपमा रहेको रिलायन्स स्पिनिङ मिल्सको पनि जम्मा १९ लाख २६ हजार कित्ता सेयर मात्रै कारोबार गर्न मिल्छ । भर्खरै नेप्सेमा सूचीकृत भएकाले यो कम्पनीको सेयरभाउ भलै कम भएपनि अत्यधिक लगानीकर्ताको रोजाईमा छ र नेप्सेको चार्टमा उच्च खरिद माग समेत देखिन्छ ।