अमेरिका–इरान युद्धका कारण भारतीय सेयरबजारमा उच्च गिरावट

काठमाण्डौ । अमेरिका–इरान युद्धका कारण भारतको सेयरबजारमा यसको प्रभाव देखिन थालेको छ ।  

भारतीय सञ्चारमाध्यमहरुका अनुसार इरान युद्धका कारण तेलको मूल्य उच्च बृद्धिले सेयरबजारमा पनि यसको असर देखिन थालेको हो । यो युद्ध सुरु भएदेखि बम्बे स्टक एक्सचेञ्ज (बीएसई) र नेशनल स्टक एक्सचेञ्ज (एनएसई) निफ्टि ५० मा करिब ७ प्रतिशतको गिरावट आएको छ ।  

यदि यो युद्ध अन्त्य नभई कच्चा तेलको मूल्य करिब १०० डलर वरिपरि पुग्यो भने यसले भारतको सेयरबजारमा उच्च प्रभाव पार्ने एमके ग्लोबलले चेतावनी दिएको छ ।

करिब ३–४ महिनासम्म कच्चा तेलको मूल्य वृद्धि भई १०० डलर वा सो भन्दा बढी पुग्यो भने निफ्टिी ५० इन्डेक्स १० प्रतिशतले घटेर २१ हजार अंकसम्म झर्न सक्ने दाबी गरिएको छ । हाल निफ्टिी ५० इन्डेक्स २३ हजार ४३० आसपासको विन्दुमा रहेको छ ।  

अमेरिका–इरान युद्धले विश्वका अधिकांश देशहरुमा असर पारेको छ । विशेषगरी कच्चा तेलको मूल्य वृद्धि र अभावले गर्दा एसियाली देशहरुमा यसको प्रत्यक्ष प्रभाव देखिन थालेको छ । नेपालमा पनि अमेरिका–इरान युद्धका कारण तेल आपूर्तिमा समस्या देखिई खाना पकाउने ग्यासको हाहाकार मच्चिन थालेको छ ।  

साथै नेपाल आयल निगमले पनि केही दिनअघि मात्रै उच्च अभाव कारण देखाई पेट्रोलियम पदार्थको मूल्य ह्वात्तै बढाएको छ । भारतमा जस्तै नेपालमा पनि अमेरिका–इरान युद्धका कारण सेयरबजारमा विस्तारै प्रभाव पार्ने सम्भावना बढ्न थालेको छ ।