यूएईमा सामाजिक संजालमार्फत अफवाह फैलाउँदा ७ नेपाली पक्राउ

काठमाण्डौ । यूएईमा सामाजिक संजालमा अफवाह फैलाएको आरोपमा हालसम्म ७ नेपाली पक्राउ परेका छन् ।  

इजरायल–अमेरिका र इरानबीच भएको युद्धपछि इरानले युएईमा मिसाइल तथा ड्रोन आक्रमण गर्दै आइरहेको छ । आक्रमणपछि खसेका ड्रोन तथा मिसाइलका फोटो, भिडियो खिच्ने, सामाजिक सञ्जालमा हालेको आरोपमा यूएई प्रहरीले हालसम्म ७ जना नेपालीलाई पक्राउ गरेको हो ।

यूईएले यसअघि नै इरानको आक्रमणसँगै त्यस्ता खालका फोटो तथा भिडियो पोस्ट नगर्न अनुरोध गरेको थियो । तर, त्यसको अवज्ञा गर्दै कतिपय नेपालीले फोटो तथा भिडियो खिच्ने र पोस्ट गर्ने गरेको थियो ।

यूएईमा त्यसरी पक्राउ परेकाहरूमाथि अनुसन्धान गर्दै दोषी ठहरिएको खण्डमा एक वर्षसम्म कैद र कैद भुक्तान भएपछि डिपोर्ट गरिदिने प्रावधान छ । साथै १ लाख यूएई दिरामसम्म जरिबाना गरिने समेत प्रावधान रहेको छ ।