बजेट अधिवेशन आजदेखि, राष्ट्रपतिले आज नीति तथा कार्यक्रम प्रस्तुत गर्ने

काठमाण्डौं । संघीय संसद्को बजेट अधिवेशन आजदेखि शुरु हुँदैछ ।  

अधिवेशनको पहिलो दिनमै सरकारले आगामी आर्थिक वर्षको नीति तथा कार्यक्रम प्रस्तुत गर्ने तयारी गरेसँगै संसद् बैठकप्रति राजनीतिक र आर्थिक क्षेत्रको चासो बढेको छ ।

संसद् सचिवालयका अनुसार राष्ट्रपति रामचन्द्र पौडेलले आज अपराह्न संघीय संसद्का दुवै सदनको संयुक्त बैठकलाई सम्बोधन गर्दै सरकारको वार्षिक नीति तथा कार्यक्रम सार्वजनिक गर्नेछन् ।  

संयुक्त बैठक अपराह्न ४ बजे बस्ने तय भएको छ ।

संविधानले प्रत्येक वर्षको पहिलो अधिवेशनको प्रारम्भमा राष्ट्रपतिबाट संयुक्त सम्बोधन गर्ने व्यवस्था गरेकाले आजको बैठकलाई संवैधानिक औपचारिकतासँगै आगामी आर्थिक वर्षको राजनीतिक दिशा तय गर्ने महत्वपूर्ण अवसरका रूपमा पनि हेरिएको छ ।

यसअघि प्रतिनिधिसभा र राष्ट्रियसभाको छुट्टाछुट्टै बैठक दिउँसो २ बजे बस्नेछ । 

प्रारम्भिक कार्यसूचीमा अधिवेशन आह्वानसम्बन्धी राष्ट्रपतिको पत्र पढेर सुनाउने, मन्त्रिपरिषद् हेरफेरबारे जानकारी गराउने तथा सभामुख अनुपस्थित हुँदा बैठक सञ्चालन गर्ने सदस्यहरूको मनोनयनलगायत विषय समावेश गरिएको छ ।

 

सरकारले जारी गरेका विभिन्न अध्यादेशहरू पनि आज संसद्मा पेश गरिने भएका छन् ।  

सार्वजनिक खरिद, संवैधानिक परिषद् तथा सार्वजनिक पदाधिकारीसम्बन्धी अध्यादेशसहित आठ वटा अध्यादेश दुवै सदनमा टेबल गर्ने तयारी गरिएको छ ।

यसपटकको बजेट अधिवेशनलाई अर्थतन्त्र सुधार, विकास खर्च, रोजगारी, लगानी वातावरण र संघीय शासन कार्यान्वयनजस्ता विषयमा सरकारको स्पष्ट रणनीति आउने सत्रका रूपमा विश्लेषण गरिएको छ ।

विपक्षी दलहरूले समेत सरकारको नीति तथा कार्यक्रमलाई कार्यान्वयन क्षमता र आर्थिक परिणामका आधारमा मूल्याङ्कन गर्ने संकेत दिएका छन् ।

राजनीतिक विश्लेषकहरूका अनुसार सरकारका प्राथमिकता, बजेटको दिशा र संसद्मा हुने बहसले आगामी आर्थिक वर्षको नीतिगत वातावरण निर्धारण गर्ने भएकाले यो अधिवेशनलाई विशेष महत्वका साथ हेरिएको छ ।