धादिङ बैरेनीमा तीन सवारी ठोक्किँदा ३७ जना घाइते, ३ जना डिस्चार्ज, ३४ काठमाडौँ रेफर

काठमाण्डौं । पृथ्वी लोकमार्गअन्तर्गत धादिङको गल्छी गाउँपालिका–६ बैरेनी क्षेत्रमा गएराति भएको सवारी दुर्घटनामा ३७ जना यात्रु घाइते भएका छन् ।

तीन सवारी साधन एकै स्थानमा ठोक्किँदा ठूलो दुर्घटना भएको प्रहरीले जनाएको छ ।

जिल्ला प्रहरी कार्यालय धादिङका अनुसार राति करिब ११्:३० बजे काठमाडौँबाट चितवनतर्फ जाँदै गरेको बा ०३–००१–००६ ख २०५६ नम्बरको ट्रक सडक किनारमा रोकिएको अवस्थामा थियो ।

सोही क्रममा बागलुङतर्फ जाँदै गरेको बा ०१–००६ ख ७४९९ नम्बरको बसले ट्रकलाई पछाडिबाट ठक्कर दिएको हो ।

त्यसलगत्तै काठमाडौँबाट वीरगञ्जतर्फ जाँदै गरेको अर्को बस बा ०१–००६ ख ६७१६ ले पनि अगाडिको बसलाई पछाडिबाट ठक्कर दिँदा श्रृंखलाबद्ध दुर्घटना भएको प्रहरीले जनाएको छ ।

दुर्घटनापछि इलाका प्रहरी कार्यालय गजुरी, प्रहरी चौकी बैरेनी तथा स्थानीयवासीको सक्रियतामा घाइतेहरूको उद्धार गरिएको थियो ।

घाइतेहरूलाई तत्कालै बैरेनी अस्पताल र स्मारिका मेडिकल हलमा प्राथमिक उपचार गरिएको हो ।

प्रहरीका अनुसार घाइतेमध्ये ३ जना उपचारपछि घर फर्किएका छन् भने ३४ जनालाई थप उपचारका लागि काठमाडौँ पठाइएको छ ।  

उनीहरूमध्ये २८ जनाको राष्ट्रिय ट्रमा सेन्टर र टिचिङ अस्पताल महाराजगन्जमा उपचार भइरहेको छ भने बाँकी ६ जनालाई अन्य अस्पतालमा रिफर गरिएको छ ।

दुर्घटनामा तीनवटै सवारी साधनमा गरी ६८ जना यात्रु सवार रहेको खुलेको छ ।

प्रहरीले घटनामा संलग्न तीनवटै सवारी चालकलाई नियन्त्रणमा लिएको छ ।  

नियन्त्रणमा लिइएकामा पर्वत कुश्माका ३२ वर्षीय शिव थापा, ललितपुरका ४५ वर्षीय पुरुषोत्तम तिमिल्सिना शर्मा र रौतहटका २८ वर्षीय प्रमोद चौधरी रहेका छन् ।