पोखराको मुख्य प्रवेशद्वारमा रहेका अव्यवस्थित टहरा हटाइयो

काठमाण्डौं । पोखरा महानगरपालिका–१२ अन्तर्गत अमरसिंहचौर क्षेत्रमा वर्षौंदेखि सञ्चालन हुँदै आएका अस्थायी टहरा अन्ततः मङ्गलबार बिहान हटाइएका छन् ।  

महानगरपालिकाले शहरी व्यवस्थापन तथा सौन्दर्यीकरण अभियानलाई तीव्र बनाउँदै डोजर प्रयोग गरेर बाँकी संरचना हटाएको हो । 

यसअघि नै महानगरपालिकाले सूचना जारी गर्दै टहरा खाली गर्न निर्देशन दिएको थियो ।  

निर्देशनपछि धेरै व्यवसायीहरूले आफ्ना संरचना आफैं हटाएका थिए भने अटेर गरिएका तथा बाँकी रहेका टहरा नगर प्रहरीको निगरानीमा डोजर प्रयोग गरी हटाइएको जनाइएको छ ।

अमरसिंह माध्यमिक विद्यालयको स्वामित्वमा रहेको खेलमैदानको दक्षिण किनारमा, पृथ्वी राजमार्गसँग जोडिएको करिब ६ रोपनी क्षेत्रफलमा ५२ वटा अस्थायी टहरा निर्माण गरिएका थिए ।  

ती टहरामा चिया पसल, खाजा घर, फलफूल तथा विभिन्न साना व्यवसाय सञ्चालन हुँदै आएका थिए ।  

लामो समयदेखि उक्त स्थान व्यापारिक गतिविधिको केन्द्र बने पनि संरचनाहरू अव्यवस्थित ढंगले फैलिँदै जाँदा क्षेत्रको स्वरूप बिग्रिएको भन्दै आलोचना हुने गरेको थियो ।

पोखराको मुख्य प्रवेशद्वारको रूपमा परिचित अमरसिंहचौर क्षेत्र पर्यटक तथा बाहिरी जिल्लाबाट आउने यात्रुहरूको पहिलो नजर पर्ने स्थानमध्ये एक हो ।

तर, सडक किनारमै अव्यवस्थित रूपमा बनेका टहराका कारण शहरको सौन्दर्यमा नकारात्मक प्रभाव परेको महानगरपालिकाको ठहर छ ।

साथै विद्यालयको स्वामित्वमा रहेको सार्वजनिक प्रयोजनको जमिन निजी व्यवसायका लागि प्रयोग भइरहेको विषयलाई लिएर समय–समयमा प्रश्नसमेत उठ्दै आएको थियो ।

महानगरपालिकाले सार्वजनिक जग्गा संरक्षण, सडक क्षेत्रलाई व्यवस्थित बनाउने तथा दीर्घकालीन शहरी योजना कार्यान्वयन गर्ने उद्देश्यले टहरा हटाउने अभियान अघि बढाएको जनाएको छ । 

महानगरका अनुसार मुख्य राजमार्ग आसपास अनधिकृत रूपमा बनाइएका संरचनाले ट्राफिक व्यवस्थापन, पैदलयात्रु आवतजावत तथा वातावरणीय व्यवस्थापनमा समेत समस्या सिर्जना गरिरहेका थिए ।

टहरा हटाइएपछि अहिले अमरसिंहचौर क्षेत्र खुला, फराकिलो र व्यवस्थित देखिन थालेको छ ।  

स्थानीयवासीहरूले पनि शहरको मुख्य प्रवेश क्षेत्र अब थप सफा र आकर्षक बन्ने अपेक्षा व्यक्त गरेका छन् ।  

कतिपयले सार्वजनिक स्थानको संरक्षणका लागि महानगरपालिकाको कदम सकारात्मक भएको बताएका छन् भने विस्थापित व्यवसायीहरूले भने वैकल्पिक व्यवस्थापनको माग गरेका छन् ।

महानगरपालिकाले आगामी दिनमा पनि सार्वजनिक जग्गा अतिक्रमण गरी बनाइएका अवैध तथा अस्थायी संरचनामाथि अनुगमनलाई निरन्तरता दिने जनाएको छ ।  

शहरी सौन्दर्य कायम राख्ने, सार्वजनिक सम्पत्तिको संरक्षण गर्ने तथा व्यवस्थित शहर निर्माण गर्ने अभियान अन्तर्गत यस्ता कार्यहरूलाई थप प्रभावकारी बनाइने महानगरपालिकाको भनाइ छ ।