कोशी–बागमतीमा बदली बढ्यो, केही स्थानमा मेघगर्जनसहित वर्षा हुने

काठमाण्डौं । नेपालमा अहिले पश्चिमी वायु र स्थानीय वायुप्रणालीको प्रभाव सक्रिय रहेको जल तथा मौसम विज्ञान विभागअन्तर्गत मौसम पूर्वानुमान महाशाखाले जनाएको छ ।  

उक्त मौसमी प्रणालीको प्रभावका कारण देशका पहाडी तथा हिमाली क्षेत्रमा बादल लाग्ने क्रम बढेको छ भने अधिकांश तराई क्षेत्रमा मौसम अझै मुख्यतया सफा रहेको छ ।

महाशाखाका अनुसार बुधबार पश्चिमी वायु र स्थानीय वायुप्रणालीको संयुक्त प्रभावका कारण देशका केही जिल्लामा मध्यमदेखि भारी वर्षासमेत भएको थियो ।  

आज बिहीबार पनि विशेषगरी कोशी, बागमती र गण्डकी प्रदेशका हिमाली तथा पहाडी क्षेत्रमा मौसम बदली रहने सम्भावना रहेको छ ।

पूर्वानुमानअनुसार दिउँसो कोशी प्रदेशसहित बागमती र गण्डकी प्रदेशका पहाडी तथा हिमाली भू-भागमा सामान्यदेखि मध्यम बादल लाग्नेछ ।  

यस्तै मधेश प्रदेशका केही क्षेत्र, बागमती र गण्डकी प्रदेशका तराई भू-भाग तथा अन्य प्रदेशका पहाडी र हिमाली क्षेत्रमा आंशिक बदली रहने महाशाखाले जनाएको छ ।  

बाँकी तराई भू-भागमा भने मौसम मुख्यतया सफा रहने अनुमान गरिएको छ ।

महाशाखाका अनुसार कोशी, बागमती र गण्डकी प्रदेशका हिमाली तथा पहाडी क्षेत्रका थोरै स्थानमा हल्कादेखि मध्यम वर्षा तथा हिमपातको सम्भावना रहेको छ ।  

त्यस्तै मधेश प्रदेश, लुम्बिनी र कर्णाली प्रदेशका पहाडी तथा हिमाली भू-भागका एक/दुई स्थानमा पनि वर्षा हुन सक्ने पूर्वानुमान गरिएको छ । 

बागमती र गण्डकी प्रदेशका तराई क्षेत्रमा समेत छिटपुट वर्षाको सम्भावना रहेको जनाइएको छ ।

यसैबीच सुदूरपश्चिम र लुम्बिनी प्रदेशका पहाडी तथा तराई भू-भागमा तातो दिनको अवस्था कायम रहने महाशाखाले जनाएको छ ।  

उच्च तापक्रमका कारण ती क्षेत्रमा गर्मीको प्रभाव अझै केही दिन रहन सक्ने मौसमविद्हरूको अनुमान छ ।

रातिको मौसम अवस्थाबारे महाशाखाले कोशी, बागमती र गण्डकी प्रदेशका पहाडी तथा हिमाली भू-भागमा सामान्य बदली रहने जनाएको छ ।  

मधेश प्रदेशसहित बागमती र गण्डकी प्रदेशका तराई भू-भाग तथा अन्य प्रदेशका पहाडी क्षेत्रमा आंशिक बादल लाग्नेछ भने बाँकी तराई क्षेत्रमा मौसम मुख्यतया सफा रहने सम्भावना रहेको छ ।

त्यस्तै रातिको समयमा कोशी, बागमती र गण्डकी प्रदेशका थोरै स्थानमा तथा मधेश प्रदेशका एक/दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ ।  

उच्च हिमाली क्षेत्रमा हल्का हिमपात हुन सक्ने सम्भावनासमेत औँल्याइएको छ ।