एशिया प्रशान्त क्षेत्रको प्रमुख सम्पत्ति व्यवस्थापन केन्द्र बन्दै सिंगापुर

काठमाण्डौ । सिंगापुरले एशिया–प्रशान्त क्षेत्रको अग्रणी सम्पत्ति तथा धन व्यवस्थापन केन्द्रको रूपमा आफ्नो स्थान अझ मजबुत बनाउँदै गएको छ। पीडब्लुसीको हालै सार्वजनिक गरिएको प्रतिवेदनअनुसार, एशिया–प्रशान्त क्षेत्रको व्यवस्थापनअन्तर्गत सम्पत्ति (एयुएम) सन् २०३० सम्म ६.८ प्रतिशत वार्षिक चक्रवृद्धि वृद्धिदरका साथ ३४.५ ट्रिलियन अमेरिकी डलर पुग्ने अनुमान गरिएको छ।

प्रतिवेदनले उत्तर अमेरिका र युरोपको तुलनामा एशिया–प्रशान्त क्षेत्रमा सम्पत्ति व्यवस्थापन उद्योगको वृद्धि तीव्र रहने देखाएको छ। क्षेत्रीय कुल ग्राहक सम्पत्ति सन् २०२४ को १०७.२ ट्रिलियन अमेरिकी डलरबाट बढेर सन् २०३० सम्म १५४.३ ट्रिलियन अमेरिकी डलर पुग्ने प्रक्षेपण गरिएको छ।

हाल सिंगापुरमा करिब ४.६ ट्रिलियन अमेरिकी डलर बराबरको सम्पत्ति व्यवस्थापन भइरहेको छ। विश्वका सार्वभौम सम्पत्ति कोषको करिब ८ प्रतिशत सम्पत्ति सिंगापुरमा केन्द्रित रहेको बताइएको छ, जसले उच्च सम्पत्ति भएका व्यक्तिहरूका लागि सिंगापुरलाई आकर्षक गन्तव्य बनाएको छ।

प्रतिवेदनअनुसार, एशिया–प्रशान्त क्षेत्रका उच्च सम्पत्ति भएका व्यक्तिहरूको कुल सम्पत्ति सन् २०३० सम्म ५२.४ ट्रिलियन अमेरिकी डलर पुग्ने अपेक्षा गरिएको छ। यसले क्षेत्रीय सम्पत्ति व्यवस्थापन उद्योगलाई थप विस्तार गर्ने आधार तयार गर्नेछ।

यस्तै, निजी बजारको महत्व पनि उल्लेखनीय रूपमा बढेको छ। सन् २०१२ मा क्षेत्रीय सम्पत्ति तथा धन व्यवस्थापन उद्योगको कुल आम्दानीमा २०.३ प्रतिशत योगदान रहेको निजी बजारको हिस्सा सन् २०२४ मा ५५.४ प्रतिशत पुगेको छ। सन् २०३० सम्म यो हिस्सा बढेर ५९.५ प्रतिशत अर्थात् करिब ९९.८ अर्ब अमेरिकी डलर पुग्ने अनुमान गरिएको छ।

डिजिटल सम्पत्तिको क्षेत्रमा पनि सिंगापुर अग्रपंक्तिमा देखिएको छ। सिंगापुरको मौद्रिक प्राधिकरणले सञ्चालन गरिरहेको प्रोजेक्ट गार्जियनमार्फत सम्पत्तिको टोकनाइजेसनलाई परीक्षण चरणबाट व्यावसायिक प्रयोगतर्फ लैजाने प्रयास भइरहेको छ। यस परियोजनामा सात विभिन्न क्षेत्राधिकारका ४० भन्दा बढी संस्थाहरू सहभागी छन्।

पीडब्लुसी सिंगापुरका एशिया–प्रशान्त तथा सिंगापुर सम्पत्ति व्यवस्थापन प्रमुख पल पाकका अनुसार, सिंगापुरको सफलताका मुख्य आधारहरूमा बलियो सार्वभौम सम्पत्ति आधार, प्रगतिशील नियामक वातावरण, विकसित पूँजी बजार तथा अन्तरदेशीय लगानीलाई सहज बनाउने कर तथा कोष संरचना प्रणाली रहेका छन्।प्रविधिमैत्री वातावरणका कारण आगामी वर्षहरूमा अझ बलियो स्थान बनाउने सम्भावना रहेको छ।