सिटिजन्स बैंकले पायो ‘बैंक अफ द इयर २०२४’ अवार्ड

काठमाण्डौ । सिटिजन्स बैंक इन्टरनेशनल लिमिटेडले ‘बैंक अफ द इयर २०२४’ अवार्ड प्राप्त गरेको छ। बेलायतको लण्डनस्थित फाइनान्सियल टाइम्सले प्रकाशित गर्ने पत्रिका ‘द बैंकरले सिटिजन्स बैंकलाई सन् २०२४ का लागि ‘बैंक अफ द इयर’ अवार्ड प्रदान गरेको हो ।  

द बैंकरले उक्त अवार्ड लण्डनमा आयोजित एक कार्यक्रममा बैंकका अध्यक्ष प्रवलजंङ्ग पाण्डे र प्रमुख कार्यकारी अधिकृत(सीईओ) गणेशराज पोखरललाई प्रदान गरेको छ ।  

सिटिजन्स बैंकले ल्याएको विभिन्न आधुनिक बैंकिङ प्रडक्ट, रिटेल बैंकिङ क्षेत्रमा बैंकले ग्राहकको सेवा सुविधाप्रति देखाएको प्रतिवद्धता र ग्रामिण,मध्यम तथा साना व्यवसायीलाई उकास्न गरेको प्रयासहरुको लागि उक्त अवार्ड प्रदान गरिएको द बैंकरले जनाएको छ ।  

सिटिजन्स बैंक इन्टरनेशनलले डिजिटल बैंकिङ ग्राहकहरुको संख्या वृद्धि भएसँगै बैंकको १७ औं वार्षिकोत्सवको अवसरमा भर्चुअल क्रेडिट कार्ड ल्याएको छ । नेपाली बैंकिङ क्षेत्रको लागि पहिलो यो कार्ड बैंकको मोबाइल एप मार्फत उपलब्ध छ र पहुँच प्रदान गर्ने बित्तिकै प्रयोग गर्न उपलब्ध छ। एप मार्फत ग्राहकले आफ्नो सुविधा अनुसार लेनदेन हेर्न र फ्रिज तथा अनफ्रिज गर्न सक्नेछन् ।

नेपालको उच्च प्रतिस्पर्धात्मक खुद्रा बैंकिङ क्षेत्रमा व्यक्तिगत ग्राहकहरूलाई आकर्षित गर्न बैंकले नागरिक स्वास्थ्य र सम्पत्ति बचत खाता सुरु गरेको छ। अनुकूल ब्याजदर र डेबिट कार्ड सहित बैंकिङ सेवाहरू प्रदान गर्नुका साथै खाताले निःशुल्क स्वास्थ्य लाभहरू प्रदान गर्दछ। यसमा पूर्ण–शरीर परामर्श भएको द बैंकरले जनाएको छ ।  

बैंकले नेपाल राष्ट्र बैंक, जर्मनीको केएफडब्लु डेभलपमेन्ट बैंक र अर्थ मन्त्रालयको सहकार्यमा ग्रामीण तथा अर्धशहरी क्षेत्रमा दिगो आर्थिक विकास –एमएसएमई फाइनान्स फेज थर्ड परियोजना मार्फत ग्रामीण लघु, साना र मझौला उद्यमहरूलाई सहयोग पुर्‍याउँदै आएको छ।  

सिटिजन्स बैंकका प्रमुख कार्यकारी अधिकृत गणेशराज पोखरेल भन्छन्, ‘प्रविधिको विकासले बैंकिङ क्षेत्रमा ग्राहकको अनुभवलाई पुनः परिभाषित गरेको छ । हाम्रो बैंकले सेवा प्रवाह र कार्य प्रक्रिया दुवैमा अत्याधुनिक प्राविधिक आविष्कारहरू अबलम्बन गरेको छ । यसले ग्राहक केन्द्रीत सेवाप्रतिको हाम्रो प्रतिबद्धता र आधुनिक बैंकिङ समाधानलाई झल्काएको छ ।’