तीनकुनेमा तनाव, समाजवादी मोर्चाको भन्दा राजावादीको जुलुस भव्य

काठमाण्डौ । राजावादीहरुले निषेधित क्षेत्र तोड्न खोज्दा काठमाण्डौको तीनकुनेमा तनाव उत्पन्न भएको छ ।  

प्रहरी र राजावादीहरुबीच तीनकुनेमा हात हालाहाल भएको हो । जसका कारण तीनकुनेको अवस्था तनावग्रस्त बनेको छ । 

प्रहरीका अनुसार राजावादी प्रदर्शनकारीहरु निषेधित क्षेत्र तोडेर नयाँ बानेश्वरतर्फ अगाडि बढ्न खोजेका थिए । प्रहरीले उनीहरुलाई रोक्ने क्रममा तनाव सिर्जना भएको हो ।  

प्रहरीले तीनकुने र आसपासको क्षेत्रमा शान्तिपूर्ण प्रदर्शन गर्न आह्वान गरिरहेको छ ।  

यसैबीच, तीनकुनेमा विभिन्न क्षेत्रबाट राजावादीहरुको जुलुस आउने क्रम जारी रहेको छ । 

उता, भृकुटीमण्डपमा पनि समाजवादी मोर्चाको छुट्टै प्रदर्शन चलिरहेको छ । त्यहाँ बाटो नै छेकेर बनाइएको विरोधसभाको मञ्च वरपर विभिन्न क्षेत्रबाट एकत्रित भएका प्रदर्शनकारीहरु जुलुससहित आउने क्रम जारी रहेको हाम्रा संवाददाताहरुले जनाएका छन् ।  

अहिलेसम्मको अवस्था हेर्दा भृकुटीमण्डपको सहभागिताभन्दा तीनकुनेको सहभागिता निकै वृहत र उत्साहजनक देखिएको छ।