सर्वोच्चद्वारा पाथीभरा केबलकार निर्माणको काम यथास्थितिमा राख्न अल्पकालीन अन्तरिम आदेश

काठमाण्डौ । सर्वोच्च अदालतले ताप्लेजुङको पाथीभरा केबलकार निर्माणमा हालसम्म भएका कामकारबाहीलाई यथास्थितिमा राख्न अल्पकालीन अन्तरिम आदेश दिएको छ । न्यायाधीश शारङ्गा सुवेदीको गत चैत १३ गतेइजलासले यस्तो आदेश दिएको हो ।  

तर उक्त आदेश आइतबार सार्वजनिक गरिएको छ । यस्तै उक्त इजलासले छलफलका लागि आगामी चैत २६ गते दुवै पक्षलाई बोलाउन समेत आदेश दिएको छ । 

पाथीभरा केबलकार निर्माणको काम रोक्न यामबहादुर लिम्बुसमेतले अन्तरिम आदेश माग गर्दै सर्वोच्चमा रिट दायर गरेका थिए । उक्त रिटमाथि वरिष्ठ अधिवक्ताहरू केदारप्रसाद दाहाल, नारायणप्रसाद देवकोटा, पद्मबहादुर श्रेष्ठ र अधिवक्ताहरु दिलराज खनाल, सोम सापकोटा, प्रेमचन्द्र राई र जितेन्द्रबहादुर मडैले बहस गरेका थिए ।  

अदालतले विपक्षीहरूमध्ये केहीलाई महान्यायाधिवक्ता, मुख्य न्यायधिवक्ताको कार्यालय र आफैँ वा प्रतिनिधिमार्फत १५ दिनभित्र लिखित जवाफ पेस गर्न पनि आदेश गरेको छ ।