चुनावी सुनिश्चितताले बजारमा छायो हरियाली, सूचक र कारोबारमै उछाल

काठमाण्डौ । फागुन २१ को चुनाव सुनिश्चित भएसँगै सेयर बजारमा उछाल आउन सुरु भएको छ ।  

लामो समयको राजनीतिक अन्यौलमा गुज्रिएको बजार समयमै निर्वाचन भई राजनीतिक र नीतिगत स्थिरता हुने आशाका कारण उछालको बाटोमा अगाडि बढेको हो । 

फागुन २१ गतेको मध्यावधि निर्वाचनका लागि प्रत्यक्षतर्फका उम्मेद्वारहरुले आज मंगलबार(माघ ६ गते) मनोनयन गर्ने हो । योसँगै चुनाव नसर्ने र समयमै हुने सुनिश्चितता भएपछि सेयर बजारका लगानीकर्तामा अभूतपूर्व उत्साह देखिएको छ । यहीकारण नेप्से परिसूचकसँगै कारोबारमा समेत उछाल आएको छ ।  

आज बजारमा कारोबार सुरु भएको डेढघण्टाभित्रै ४९.५० अंकको बढोत्तरी भएर नेप्से परिसूचक २७२२ को उचाईमा पुगेको छ भने यो अवधिमा ५ अर्ब ६३ करोड बढीको सेयर कारोबार भइसकेको छ । 

यो बेलासम्म व्यापारबाहेकका सबै समूहमा हरियाली छाएको छ । होटल तथा टुरिजम सेक्टरमो ३.२९ प्रतिशतको उछाल देखिएको छ भने लगानी समूह, वित्त समूह, जीवन बीमा समूह, अन्य समूह लगायतका उपसमूहमा २ प्रतिशत बढीको बढोत्तरी भइसकेको छ ।  

सेयर बजारका जानकारहरुका अनुसार राजनीतिक स्थिरता नहुने त्रासका बीच पर्ख र हेरको रणनीतिसहित बसेका लगानीकर्ताहरु समेत धमाधम बजार प्रवेश गर्न थालेपछि सूचक र कारोबारमै उछाल देखिएको हो । एकातिर पुस मसान्तको दवाब सकिएको र अर्कोतर्फ चुनावको सुनिश्चितता भएपछि जेनजी आन्दोलनपछि सुस्ताएको बजारमा एकाएक चमक फर्किएको हो ।  

यो समाचार तयार पार्दासम्म बजारमा कारोबार आएकामध्ये २३४ कम्पनीको मूल्य बढेको छ भने २१ कम्पनीको घटेको छ । ४ वटा कम्पनीको मूल्य स्थिर देखिएको छ ।