(2).gif)
.png)
काठमाण्डौ । चीनले विद्युतीय सवारीसाधनमा प्रयोग हुँदै आएको हिडन डोर ह्याण्डलमा प्रतिबन्ध लगाएको छ। यस्तो डिजाइन अमेरिकी उद्योगपति एलन मस्कको कम्पनी टेस्लाले लोकप्रिय बनाएको थियो । यस निर्णयसँगै चीन यस्तो डिजाइनमाथि रोक लगाउने विश्वकै पहिलो देश बनेको छ।
हालै चीनमा भएका केही घातक दुर्घटनापछि ईभीको सुरक्षामाथि प्रश्न उठ्दै आएको छ। विशेष गरी साओमीका दुई विद्युतीय गाडी दुर्घटनामा पावर फेल भएपछि ढोका नखुलेको आशंका गरिएको थियो, जसका कारण यात्रुको ज्यान गएको बताइएको छ।
चीनको उद्योग तथासूचना प्रविधि मन्त्रालयले जारी गरेको नयाँ नियमअनुसार अब बजारमा बिक्री हुने सबै सवारी साधनमा ढोकाको भित्री र बाहिरी भागमा अनिवार्य रूपमा मेकानिकल रिलिज प्रणाली हुनुपर्नेछ। यी नियमहरू १ जनवरी २०२७ देखि लागू हुनेछन्।
नियमअनुसार बुट (डिक्की) बाहेक प्रत्येक यात्रु ढोकाको बाहिरी भागमा कम्तीमा ६ सेमि × २सेमि × २.५ सेमि आकारको खोच हुनुपर्नेछ, जसले ह्यान्डलमा सहज पहुँच सुनिश्चित गर्छ। साथै, गाडीको भित्री भागमा ढोका खोल्ने तरिका देखाउने कम्तीमा १ सेमि × ०.७सेमि आकारको स्पष्ट संकेत राख्नुपर्नेछ।
यसअघि नै स्वीकृति पाइसकेका र चिनियाँ बजारमा प्रवेशको अन्तिम चरणमा रहेका मोडलहरूलाई भने डिजाइन परिमार्जनका लागि थप दुई वर्षको समय दिइनेछ।
विद्युतीय, हाइब्रिड र फ्युलसेल गाडीहरू समावेश चीनको न्यू इनर्जी भेहिकल बजारमा हिडेन डोर ह्याण्डल व्यापक रूपमा प्रयोग हुँदै आएका छन्। सरकारी अखबार चाइना डेली का अनुसार, चीनका शीर्ष १०० बढी बिक्री हुने न्यू इनर्जी भेहिकल मोडलमध्ये करिब ६०प्रतिशत मा यस्तो डिजाइन प्रयोग गरिएको छ।
यी नियमहरू चीनमै बिक्री हुने मोडलमा मात्र लागू भए पनि, विश्वव्यापी अटोमोबाइल उद्योगमा चीनको ठूलो प्रभाव भएकाले यसको असर अन्तर्राष्ट्रिय स्तरमै पर्ने अपेक्षा गरिएको छ।
यसैबीच, टेस्लाका ढोका ह्यान्डलहरूबारे अमेरिकामा पनि अनुसन्धान भइरहेको छ। अमेरिकी राष्ट्रिय राजमार्ग यातायात सुरक्षा प्रशासनले गत नोभेम्बरमा टेस्लाको मोडल वाईमा प्रयोग भएका विद्युतीय ह्यान्डल अचानक काम नगरेको गुनासोपछि अनुसन्धानसुरु गरेको थियो।
२०२१ मोडलका टेस्ला गाडीहरूमा यसबारे नौ वटा उजुरी प्राप्त भएको राष्ट्रिय राजमार्ग यातायात सुरक्षा प्रशासनले जनाएको छ । जसमध्ये चार घटनामा यात्रुहरूलाई उद्धार गर्न गाडीको सिसा फुटाउनु परेको थियो।
.png)
.png)
.jpg)
.jpg)
