पूर्वराजा शाहले भने, ‘राष्ट्रिय समस्या समाधान नगरी निर्वाचनमा जानु उचित हुँदैन’

काठमाण्डौ । पूर्वराजा ज्ञानेन्द्र शाहले मुलुकमा राष्ट्रिय समस्या समाधान नगरी निर्वाचनमा जाने निर्णय तत्काल उपयुक्त नहुने बताएका छन्। ७४औँ राष्ट्रिय प्रजातन्त्र दिवसको अवसरमा बुधबार जारी भिडियो सन्देशमा उनले यस्तो बताएका हुन् ।

उनले वर्तमान राजनीतिक अस्थिरता र राष्ट्रिय समस्या समाधान नगरी चुनावमा जानु उचित नहुने बताए ।

उनले भने, ‘प्रजातान्त्रिक व्यवस्थामा प्रतिनिधि छान्नु स्वाभाविक प्रक्रिया हो, तर अहिलेको अवस्थालाई ध्यानमा राख्दै पहिला राष्ट्रिय समस्याहरू समाधान गर्नु आवश्यक छ।’ उनका अनुसार, चुनावपछि खिचातानी र द्वन्द्व उत्पन्न नहोस् भनेर समझदारीपूर्वक अघि बढ्नु मुलुकको हितमा हुनेछ।

यस्तै उनले कुनै व्यवस्थाको राम्रा र असल पक्षहरू टिप्नु र राख्नुपर्ने बताउँदै जुनै व्यवस्थाको नराम्रो र खराब पक्षहरू हुन्छन्, त्यस्तालाई फाल्नु र फ्याँक्नुपर्ने बताए ।  

पूर्वराजाले अहिलेको परिस्थितिमा नागरिकहरूले अधिकार मात्र खोज्ने र कर्तव्यवोध नदेखाउने प्रवृत्ति दुखद् रहेको बताएका छन्। ‘आलोपालो भाग लगाएर खाऔँ भन्ने सोचले होइन, मिलेर काम गर्ने दृष्टिकोणले मुलुकलाई नयाँ गति दिन सकिन्छ,’ उनले भने ।

उनले नागरिक सचेत र जागरुक नभएसम्म प्रजातन्त्र बलियो नहुनेमा पनि जोड दिएका छन्। सिंगो मुलुक अहिले अस्वाभाविक छटपटी, अन्योल र अस्तित्व संकटको सामना गरिरहेको र आम नेपालीले त्यसको अनुभव गरिरहेको पूर्वराजाले बताए।

यस्तै उनले विगतमा भएका आन्दोलन र संघर्षले ल्याएका परिवर्तनले देश र जनतालाई के दियो भन्ने आत्मसमीक्षा गर्ने बेला आएको समेत बताए ।