सेयरबजारमा सामान्य सुधार, कारोबार रकम भने घटेर ५.१३ अर्बमा खुम्चियो

काठमाण्डौ । साताको दोस्रो कारोबार दिन आज सेयरबजारमा सामान्य वृद्धि देखिएको छ । आज नेपाल स्टक एक्सचेञ्ज (नेप्से) परिसूचक ०.०९ प्रतिशत अर्थात् २.४१ अंकले बढेर २,६१६.९७ विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.३६ प्रतिशतले बढेर ४५१.०५ विन्दुमा पुगेको छ।

आज नेप्सेमा सूचीकृत ३२९ वटा कम्पनीका १ करोड २६ लाख २१ हजार १८८ कित्ता सेयर किनबेच हुँदा कुल कारोबार रकम ५ अर्ब १३ करोड ८६ लाख रुपैयाँभन्दा बढी पुगेको छ। अघिल्लो कारोबार दिन भने ६ अर्ब ६९ करोड रुपैयाँभन्दा बढीको कारोबार भएको थियो।

सबै समूहमा गिरावट

आज कारोबारमा आएका १३ वटा समूहमध्ये ६ वटामा हरियाली छायो भने बाँकी ७ वटामा रातो पोतियो । विकास बैंक समूह सर्वाधिक ०.९० प्रतिशतले बढ्दा बैंकिङ समूह ०.२८ प्रतिशत, फाइनान्स ०.५६ प्रतिशत, लगानी ०.३७, जीवन बीमा ०.०७ र अन्य समूह ०.०८ प्रतिशतले बढ्यो ।

आज म्युचुअल फण्ड समूहमा सर्वाधिक अर्थात ०.४१ प्रतिशतको गिरावट आयो । होटल समूह पनि आज ०.३५ प्रतिशत, हाईड्रो ०.२३, उत्पादन तथा प्रशोधन ०.०६, लघुवित्त ०.०७, निर्जीवन बीमा ०.२२ र व्यापार ०.०३ प्रतिशतले घटे ।

सर्वाधिक कारोबार हुने कम्पनी

आज आँखुखोला जलविद्युत कम्पनीको सर्वाधिक ३६ करोड २ लाख रुपैयाँभन्दा बढीको सेयर कारोबार भएको छ।

त्यसैगरी रिडी पावरको ३२ करोड १९ लाख, एसवाई प्यानलको २८ करोड ७८ लाख, सिईडिबी होल्डिङको १८ करोड ९५ लाख र ङादी ग्रुप पावरको १६ करोड ७५ लाख रुपैयाँभन्दा बढीको कारोबार भएको छ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरूमध्ये सालपा विकास बैंकको सेयरमूल्यमा मात्रै सकारात्मक सर्किट लागेको छ।

यसैगरी रिलायन्स स्पिनिङ मिल्सको सेयरमूल्य ९.२८ प्रतिशत, सपोर्ट माइक्रोफाइनान्सको ६.१० प्रतिशत र नेपाल एसबीआई बैंकको सेयरमूल्य ६ प्रतिशतले बढ्यो ।

यता मोलुङ हाइड्रोपावरको सेयरमूल्य सर्वाधिक ४.४२ प्रतिशतले घटेको छ। साथै कालिका लघुवित्तको सेयरमूल्य ३.९८ प्रतिशत, माईखोला हाईड्रोको ३.५१ प्रतिशत र शुभम् पावरको सेयरमूल्य ३.१७ प्रतिशतले घटेका छन्।