अभागी भूपदेवः बालेनको खास मान्छे बने, घण्टीको सुनामी आएकै बेला नमीठो हार व्यहोरे

काठमाण्डौ । राष्ट्रिय स्वतन्त्र पार्टी(रास्वपा)को देशभर जबरजस्त लहर छ । यहीकारण प्रतिनिधिसभा सदस्य निर्वाचनमा रास्वपा दुईतिहाई बहुमत नजिक पुगेको छ ।  

रास्वपाले यो पटकको निर्वाचनमा ऐतिहासिक जित निकालिसकेको छ । एमाले, कांगे्रस, माओवादी, मधेशवादीजस्ता परम्परागत राजनीतिक शक्तिहरुका वर्षौदेखिका किल्ला रास्वपाको पक्षमा आएको जनमतको सुनामीले तहसनहस बनाइदिएको छ । 

कतिपय क्षेत्रमा उठेर चुनाव जितेका रास्वपाको उम्मेद्वारहरुको अनुहार हेर्दा त्यहाँ जुनसुकै पात्र उठेको भए पनि जित्थ्यो भन्ने धेरैलाई लागेको छ र यथार्थ पनि त्यस्तै नै छ । उदाहरणका लागि मधेशको एक सिटमा उम्मेद्वारी खारेजीमा परेका रास्वपाका उम्मेद्वारको पक्षमा प्रचण्ड बहुमत आएको छ ।  

यसरी हेर्दा रास्वपाको ऐतिहासिक आँधीहुरी र जनमतको सुनामी आएकै बेला भावी प्रधानमन्त्रीको रुपमा रास्वपाको पक्षमा जबरजस्त माहौल तयार गरेका सो दलका वरिष्ठ नेता बालेन शाहलाई भने झट्का लागेको छ । बालेनले चुनावी अभियानमा समेत विशेष समय दिएका आफ्नै प्रिय पात्रलाई संसद सदस्य बनाउन सकेनन् ।  

काठमाण्डौ महानगरपालिकाको मेयरको चुनावी दौडदेखि नै बालेनको दाहिने हात भएर काम गरेका तथा मेयर भइसकेपछि समेत स्वकीय सचिव तथा सल्लाहकारको रुपमा सक्रिय भूपदेव शाहले शर्मनाक पराजय व्यहोरेका छन् । 

शाह बालेन टिमको थिंकट्यांकको रुपमा समेत चिनिन्छन् । बालेन राजनीतिमा प्रवेश गरेदेखि नै उनले अनवरत साथ दिइरहेका छन् । यसपटक देशभर बालेन प्रभावले काम गरे पनि उनी भने अपवाद बन्न पुगे ।  

भूपदेव शाह यसपटकको संसदीय निर्वाचनमा अछाम २ बाट उठेका थिए । तर सो क्षेत्रमा चौथो स्थानमा सीमित बन्न पुगे । विजयी उम्मेद्वारभन्दा आधा कम मतमा सीमित भए ।

सो स्थानमा एमालेका यज्ञबहादुर बोगटीले ९ हजार ५१८ मतसहित जित निकाले ।

दोश्रो स्थानमा रहेका नेपाली कांग्रेसका पुष्पबहादुर शाहले ९ हजार ४६ मत पाए भने तेश्रो स्थानमा रहेका नेकपाका उम्मेद्वार बलबहादुर कुँवरले  ६ हजार ४९३ मा चित्त बुझाउनुपर्यो ।  

रास्वपाको उम्मेद्वारको रुपमा चुनावमा होमिएका भूपदेवको भने ४ हजार ५६२ मत मात्रै आयो ।