ओली पक्राउविरुद्धको एमाले प्रदर्शनमा फरार अभियुक्तको संलग्नता भेटियो !

काठमाण्डौ । नेकपा (एमाले) अध्यक्ष तथा पूर्व प्रधानमन्त्री केपी शर्मा ओलीको पक्राउविरुद्ध गरिएको प्रदर्शनमा फरार अभियुक्तहरू समेत संलग्न रहेको खुलेको छ। प्रहरीका अनुसार शनिबार बबरमहलबाट पक्राउ परेका विमल धमला बैंकिङ कसुरसम्बन्धी मुद्दामा फरार प्रतिवादी रहेको पुष्टि भएको हो।

जिल्ला प्रहरी परिसर काठमाडौंका एसपी पवन भट्टराईका अनुसार धमला दुई वटा फरक मुद्दामा फरार सूचीमा रहेका व्यक्ति हुन्। उनलाई हाल हिरासतमा राखेर थप अनुसन्धान भइरहेको छ।

प्रहरीले जनाएको अनुसार, प्रदर्शनका क्रममा धमलाले बबरमहलस्थित एक निजी स्कोर्पियो गाडीमा तोडफोड गर्ने प्रयास गरेका थिए, त्यसपछि उनलाई नियन्त्रणमा लिइएको हो।

उक्त प्रदर्शनबाट पक्राउ परेका अन्य ६ जनालाई भने सामान्य सोधपुछपछि रिहा गरिएको प्रहरीले जानकारी दिएको छ।