बीपी राजमार्गमा यात्रा गर्दा सडकको अवस्था बुझेर यात्रा गर्न स्थानीय प्रसाशनको आग्रह

काठमाण्डौं । सुरक्षा निकायले बीपी राजमार्गमा यात्रुहरूलाई सडकको अवस्था बुझेर  मात्र दिउँसो यात्रा गर्न र जोखिमपूर्ण अवस्थामा यात्रा नगर्न आग्रह गरेको छ।

बीपी राजमार्गको काभ्रेअन्तर्गत रोशी क्षेत्रमा बारम्बार सडक अवरुद्ध हुन थालेपछि जिल्ला सुरक्षा समितिले रातिको सवारी आवागमनमा पूर्ण प्रतिबन्ध लगाएको थियो । 

बाढी र पहिरोको सम्भावित जोखिमलाई ध्यानमा राख्दै मङ्गलबारदेखि अर्को सूचना जारी नहुँदासम्म साँझ ५ बजेदेखि बिहान ५ बजेसम्म सडक बन्द गर्ने निर्णय गरिएको हो।

जिल्ला प्रहरी कार्यालय काभ्रेका अनुसार रोशी खोलामा बढ्दो बाढीले अस्थायी डाइभर्सनहरू बगाउने खतरा बढेकाले यात्रुको सुरक्षाका लागि यस्तो कदम चालिएको हो।  

यसअघि सोमबार राति रोशी गाउँपालिकाको लास्कोट–घुमाउने खण्डमा अलपत्र परेका ८९ जना यात्रुलाई सुरक्षा निकायले राति १ बजे उद्धार गरेको थियो। 

वर्षाका कारण सडक अवरुद्ध भएपछि सवारी साधनहरू धुलिखेल, मङ्गलटार र सिन्धुलीको नेपालथोक क्षेत्रमा रोकिएका छन्।  

गतवर्ष आएको भीषण बाढीले चौकीडाँडादेखि नेपालथोकसम्म करिब १८ किलोमिटर सडक बगाएपछि हाल खोलाको किनारैकिनार अस्थायी डाइभर्सनमार्फत यातायात सञ्चालन हुँदै आएको छ।

डिभिजन सडक कार्यालय भक्तपुरले उक्त क्षेत्रमा स्थायी सडक निर्माण कार्य जारी रहेको जनाएको छ।