आइएमई लाइफ इन्स्योरेन्सद्वारा ३६.७९ करोड खुद नाफा आर्जन, बीमाशुल्क आर्जन ३९% ले बढ्यो

काठमाण्डौ । आइएमई लाइफ इन्स्योरेन्स कम्पनी लिमिटेडले चालु आर्थिक वर्षको तेस्रो त्रैमाससम्म ३६ करोड ७९ लाख रुपैयाँ खुद नाफा आर्जन गरेको छ । अघिल्लो आर्थिक वर्षको सोही अवधिको तुलनामा कम्पनीको नाफा ०.४३ प्रतिशतले मात्र बढी हो ।

समीक्षा अवधिमा कम्पनीको कुल आम्दानी ६ अर्ब १७ करोड रुपैयाँ पुगेको छ । अघिल्लो वर्ष कम्पनीको कुल आम्दानी ४ अर्ब ८२ करोड रहेको थियो । कम्पनीको खुद बीमाशुल्क आम्दानी ५ अर्ब १ करोड रुपैयाँ पुगेको छ, जुन अघिल्लो वर्षको तुलनामा ३९.१७ प्रतिशतले बढी हो । यसले कम्पनीको व्यवसाय विस्तार भईरहेको संकेत गरेको छ ।

यद्यपि, आम्दानीसँगै दाबी भुक्तानी र खर्च पनि बढेका छन् । कम्पनीले तेस्रो त्रैमाससम्म ४ अर्ब ५८ करोड रुपैयाँ खुद दाबी भुक्तानी गरेको छ, जुन अघिल्लो वर्षको ३ अर्ब ५१ करोड रुपैयाँभन्दा धेरै हो । साथै, कुल खर्च ५ अर्ब ८१ करोड रुपैयाँ पुगेको छ, जुन ३०.१९ प्रतिशतको वृद्धि हो ।

लगानी तथा कर्जा आम्दानीबाट कम्पनीले १ अर्ब १ करोड रुपैयाँ आर्जन गरेको छ भने बीमितलाई प्रदान गरिएको कर्जाबाट ७ करोड ४१ लाख रुपैयाँ ब्याज आम्दानी गरेको छ ।

यस्तै कम्पनीको चुक्तापूँजी ५ अर्ब रुपैयाँ रहेको छ भने सेयर प्रिमियम शीर्षकमा ५२ करोड ३८ लाख रुपैयाँ सञ्चित छ । समीक्षा अवधिमा प्रतिसेयर आम्दानी (ईपीएस) ९.८१ रुपैयाँ, प्रतिसेयर नेटवर्थ १३१.४९ रुपैयाँ र मूल्य आम्दानी अनुपात ४५.४६ गुणा कायम भएको छ ।