‘सानिमा इक्विटी फण्ड-२’ को इकाई निष्काशन वैशाख २४ गते बिहीबारदेखि खुल्ने

काठमाण्डौ । सानिमा म्युचुअल फण्ड अन्तर्गत सञ्चालन हुन लागेको ‘सानिमा इक्विटी फण्ड-२’ को इकाई सार्वजनिक निष्काशन तथा बिक्री वैशाख २४ गते बिहीबारदेखि खुल्ने भएको छ ।

सानिमा क्यापिटल लिमिटेडले योजना व्यवस्थापक तथा कोष प्रवर्द्धक सानिमा बैंकको सहकार्यमा प्रतिइकाई मूल्य १० रुपैयाँ दरका कुल १० करोड इकाई निष्काशन गर्न लागेको हो । यसमध्ये १५ प्रतिशत अर्थात १ करोड ५० लाख इकाई कोष प्रवर्द्धक सानिमा बैंकलाई सुरक्षित गरिएको छ भने बाँकी ८ करोड ५० लाख इकाई सर्वसाधारणका लागि बिक्री खुला गरिने जनाएको छ ।

सूचनाअनुसार लगानीकर्ताले न्यूनतम १०० इकाईदेखि अधिकतम १ करोड इकाईसम्म आवेदन दिन सक्नेछन् । इकाई खरिदका लागि प्रतिइकाई १० रुपैयाँ तिर्नुपर्ने व्यवस्था गरिएको छ ।

निष्काशन वैशाख २४ गते बिहीबारदेखि खुल्नेछ । छिटोमा जेठ २ गते बैंकिङ समयपछि आवेदन बन्द हुनेछ भने आवश्यक आवेदन नपरेमा ढिलोमा जेठ १२ गतेसम्म खुला रहनेछ ।

लगानीकर्ताले नेपाल धितोपत्र बोर्डबाट अनुमति प्राप्त आश्वा सदस्य बैंक तथा वित्तीय संस्थामार्फत सी–आश्वा प्रणाली प्रयोग गरी आवेदन दिन सक्नेछन् । साथै, मेरो सेयरमार्फत अनलाइन आवेदनको व्यवस्था पनि गरिएको छ ।

सानिमा क्यापिटलले यो योजना दीर्घकालीन पूँजी बजार लगानीलाई लक्षित गरी ल्याइएको जनाएको छ । नेपालको सेयर बजारमा संस्थागत लगानीको दायरा विस्तार गर्ने उद्देश्यसहित फण्ड सञ्चालनमा ल्याउन लागिएको कम्पनीको भनाइ छ ।