अपि पावरको नाफामा ८६ प्रतिशतको बढोत्तरी, विद्युत बिक्री आम्दानी १.३० अर्ब

काठमाण्डौ । अपि पावर कम्पनी लिमिटेडले चालु आर्थिक वर्षको तेस्रो त्रैमाससम्म ६५ करोड ८५ लाख रुपैयाँ खुद नाफा आर्जन गरेको छ । यो रकम अघिल्लो आवको सोही अवधिको तुलनामा ८६.२९ प्रतिशतले बढी हो । अघिल्लो आवको सोही अवधिसम्म भने कम्पनीले ३५ करोड ३४ लाख रुपैयाँबराबरको खुद नाफा आर्जन गरेको थियो ।  

यस्तै कम्पनीले ९३ लाख ३६ हजार रुपैयाँबराबरको अन्य आम्दानी गरेको छ ।

कम्पनीको वित्त खर्चमा उल्लेखनीय गिरावट आएको छ । अघिल्लो वर्ष ४५ करोड ८८ लाख रुपैयाँ रहेको वित्त खर्च घटेर यस वर्ष ३१ करोड ८५ लाख रुपैयाँमा सीमित भएको छ। प्रशासनिक खर्च पनि ३ करोड २७ लाखबाट घटेर २ करोड ३४ लाख रुपैयाँमा झरेको छ। यद्यपि ह्रासकटी खर्च भने ३१ करोड ७६ लाखबाट बढेर ३१ करोड ८८ लाख रुपैयाँ पुगेको छ।

कम्पनीले विद्युत बिक्रीबाट १ अर्ब ३० करोड आर्जन गरेको छ । जुन अघिल्लो वर्षको तुलनामा ८.९६ प्रतिशतले बढी हो। वित्त आम्दानी ४ लाख ३८ हजारबाट घटेर १ लाख ८४ हजार रुपैयाँमा झरेको छ।

६ अर्ब ३७ करोड रुपैयाँ चुक्तापुँजी रहेको कम्पनीको कुल चालु सम्पत्ति ६५ करोड ३९ लाख रुपैयाँ छ भने कुल चालु दायित्व २ अर्ब ४७ करोड रुपैयाँ पुगेको छ।

समीक्षा अवधिसम्म कम्पनीको प्रतिसेयर आम्दानी(ईपीएस) बढेको छ । अघिल्लो आवमा ७.७६ रुपैयाँ रहेको ईपीएस १३.७६ रुपैयाँ पुगेको छ । कम्पनीको प्रतिसेयर नेटवर्थ ११५.३२ रुपैयाँ, मूल्य आम्दानी अनुपात २५.३० गुणा र तरलता अनुपात ०.२६ प्रतिशत कायम भएको छ ।