शिवम् सिमेन्टको नाफा ५४% ले वृद्धि, ईपीएस १४.७६ रुपैयाँ

काठमाण्डौ । आम्दानी वृद्धि र खर्च घटेसँगै शिवम् सिमेन्टको नाफा वृद्धि भएको छ । कम्पनीले चालु आवको तेस्रो त्रैमाससम्म ६१ करोड ९१ लाख रुपैयाँ खुद नाफा आर्जन गरेको छ । यो रकम अघिल्लो आवको तुलनामा ५४.५८ प्रतिशतले बढी हो । अघिल्लो आवको तेस्रो त्रैमाससम्म भने कम्पनीले ४० करोड ५ लाख रुपैयाँ खुद नाफा आर्जन गरेको थियो ।

कम्पनीले यो अवधिमा १ अर्ब १४ करोड रुपैयाँबराबरको खुद आम्दानी गरेको छ । अघिल्लो आवमा भने कम्पनीको खुद आम्दानी १ अर्ब ३८ लाख रुपैयाँ रहेको थियो ।  

खर्च नियन्त्रणमा भने कम्पनी सफल भएको छ । अघिल्लो आवमा ६५ करोड ४८ लाख रुपैयाँ रहेको कम्पनीको कुल खर्च घटेर ५४ करोड ८३ लाखमा सीमित बनेको छ ।

कम्पनीले सेयर प्रिमियम शिर्षकमा ९५ करोड ६२ लाख छुट्टाएको छ । तेस्रो त्रैमाससम्म कम्पनीको कुल चालु सम्पत्ति ४ अर्ब २७ करोड र कुल चालु दायित्व २ अर्ब ५१ करोड रहेको छ ।

समीक्षा अवधिसम्म कम्पनीको प्रतिसेयर आम्दानी(ईपीएस) १४.७६ रुपैयाँ, प्रतिसेयर नेटवर्थ १८५.३१ रुपैयाँ, प्रतिसेयर कुल सम्पत्तिको मूल्य २३४.०१ रुपैयाँ र तरलता अनुपात १.७० प्रतिशत कायम भएको छ ।