एनएलजी इन्स्योरेन्सको नाफा ७१.७८% ले घट्यो, इपीएस जम्मा ०.९८ रुपैयाँ

काठमाण्डौ । एनएलजी इन्स्योरेन्स कम्पनीले चालु आवको तेस्रो त्रैमाससम्म ३ करोड ४८ लाख रुपैयाँ नाफा कमाएको छ ।  

कम्पनीको यो नाफा गत आवको सोही अवधिसम्मको तुलनामा भने ७१.७८ प्रतिशत कम हो । गत आवको तेस्रो त्रैमाससम्म कम्पनीले १२ करोड ३३ लाख रुपैयाँ नाफा कमाएको थियो ।

सो अवधिसम्म कम्पनीको लगानीबाट हुने आम्दानीमा गिरावट आउँदा र दाबी भुक्तानी  बढ्दा नाफा घट्न पुगेको हो । लगानीबाट हुने आम्दानी ७.७३ प्रतिशतले घटेर १२ करोड ३८ लाख रुपैयाँमा सीमित भएको छ ।  

साथै कम्पनीको दाबी भुक्तानी १८.६३ प्रतिशतले बढेर २ अर्ब २ करोड ९१ लाख रुपैयाँ पुगेको छ । गत आवको सोही अवधिसम्म कम्पनीले १ अर्ब ७१ करोड ५ लाख रुपैयाँ बराबरको दाबी भुक्तानी दिएको थियो ।  

कम्पनीको व्यवसायमा भने सामान्य सुधार देखिएको छ । गत आवको चैत मसान्तसम्म ६६ करोड ५८ लाख रुपैयाँ बराबरको प्रिमियम संकलन गरेको यस कम्पनीले चालु आवको चैत मसान्तसम्म ७.३२ प्रतिशत बढाएर ७१ करोड ४५ लाख रुपैयाँ बराबरको प्रिमियम संकलन गरेकोछ ।  

कम्पनीको बीमा कोषको आकार ३८.५५ प्रतिशत बढेर ४ अर्ब ६० करो ७८ लाख रुपैयाँ पुगेको छ भने महाविपत्ती कोषको आकार २.०१ प्रतिशत बढेर कोषमा ८ करोड ८३ लाख रुपैयाँ संचित छ । कम्पनीको रिटेन्ड अर्निङ भने ८१.३३ प्रतिशतले घटेर १ करोड ७० लाख रुपैयाँमा सीमित भएको छ ।  

कम्पनीको इपीएस ०.९८ रुपैयाँ रहेको भने प्रतिसेयर नेटवर्थ १७०.९३ रुपैयाँ, मूल्य आम्दानी अनुपात ६४१.८३ गुणा र प्रतिसेयर कुल सम्पत्तिको मूल्य ३६७.३८ रुपैयाँ रहेको ।