तीन हजार ७०० अफगान शरणार्थी एकै दिन स्वदेश फिर्ता

काठमाण्डौ । पाकिस्तानले पछिल्लो एक साताको अवधिमा ७६३ अफगान नागरिकलाई जेलमुक्त गरेको जनाएको छ।

विभिन्न मुद्दामा पक्राउ परेका ती अफगान नागरिकहरूलाई रिहा गरी स्वदेश फर्काइएको पाकिस्तानी अधिकारीहरूले बताएका छन्।

अफगानिस्तानका अधिकारीहरूका अनुसार शनिबार मात्रै करिब तीन हजार ७०० अफगान शरणार्थी पाकिस्तानबाट फर्किएका छन्।  

उनीहरू दक्षिणी कान्दाहारस्थित स्पिन बोल्डक नाका र पूर्वी नङ्गरहारस्थित तोरखाम सीमा हुँदै अफगानिस्तान प्रवेश गरेका हुन्।

रिहा गरिएका कैदीहरू विभिन्न अभियोगमा पाकिस्तानका जेलमा रहेका थिए।  

पछिल्लो समय पाकिस्तानले कागजातविहीन विदेशी नागरिकमाथि निगरानी र नियन्त्रण कडा बनाएसँगै अफगान नागरिकहरूको स्वदेश फिर्ती क्रम तीव्र बनेको देखिएको छ।

संयुक्त राष्ट्रसंघीय तथ्यांकअनुसार करिब ६० लाख अफगान नागरिक विभिन्न देशमा शरणार्थी वा आप्रवासीका रूपमा बसोबास गरिरहेका छन्।  

तीमध्ये ठूलो संख्या पाकिस्तान र इरानमा रहेको छ।

हाल पाकिस्तान र इरान दुवैले वैध कागजात नभएका विदेशी नागरिकलाई स्वदेश फर्काउन दबाब बढाइरहेका छन्।  

यस नीतिका कारण हजारौं अफगान नागरिक पछिल्ला महिनाहरूमा अफगानिस्तान फर्किन बाध्य भएका छन्।