विश्वकपको नाममा नेपालमा साइबर ठगी बढ्यो, जेठयता ११५ उजुरी

काठमाण्डौ । फिफा विश्वकप २०२६ को समूह चरणका खेलहरू सम्पन्न भएसँगै विश्वभर फुटबलको चर्चा चुलिएको छ।  

अमेरिका, मेक्सिको र क्यानडामा जारी प्रतियोगिता हेर्ने नाममा नेपालमा भने साइबर ठगीका घटना बढेको पाइएको छ।

फुटबल लाइभ स्ट्रिमिङका लागि सामाजिक सञ्जालमा फैलाइएका फर्जी विज्ञापनमार्फत नेपाली प्रयोगकर्तालाई ठगी गरिएको भन्दै प्रहरीले अनुसन्धान अघि बढाएको छ।  

साइबर ब्यूरोका अनुसार ‘निःशुल्क लाइभ हेर्न पाइने’ भनी फैलाइएका लिंक र एपमार्फत बैंक खातासम्म पहुँच पुर्‍याएर रकम चोरी गर्ने गिरोह सक्रिय रहेको पाइएको हो।

एक पीडितले सामाजिक सञ्जालमा देखिएको ‘नेपालको अल इन वान टिभी एप (जिजी टिभी)’ डाउनलोड गर्दा बैंक विवरण प्रविष्ट गर्न बाध्य पारिएको र त्यसपछि उनको खाताबाट करिब २३ हजार रुपैयाँ अनधिकृत रूपमा ट्रान्सफर भएको घटना सार्वजनिक भएको छ।

प्रहरीका अनुसार यस्तो प्रकृतिका ठगीका उजुरी पछिल्लो समय बढ्दै गएका छन्।  

जेठयता मात्रै ११५ भन्दा बढी उजुरी दर्ता भएको साइबर ब्यूरोले जनाएको छ।  

हालसम्म करिब २ करोड २९ लाख रुपैयाँभन्दा बढी रकम ठगी भएको पुष्टि भएको छ।

अनुसन्धान अनुसार गिरोहले फेसबुकजस्ता सामाजिक सञ्जालमा फिफा विश्वकप निःशुल्क हेर्न सकिने भन्दै फिसिङ लिंक फैलाउने गरेको छ।

ती लिंकमार्फत प्रयोगकर्तालाई एपिके फाइल डाउनलोड गराइ बैंकमा पहुँच दिने कोड प्रविष्ट गराउने र त्यसपछि खाताबाट रकम झिक्ने गरिएको पाइएको छ।

साइबर ब्यूरोले यस्ता अनधिकृत‘.exe’, ‘.bat’  वा एपिके फाइल भएका लिंक नखोल्न र अनलाइनमा निःशुल्क भन्दै आएका अविश्वसनीय प्रस्तावबाट सचेत रहन सर्वसाधारणलाई आग्रह गरेको छ।  

प्रहरीले हालसम्म आरोपीहरू पक्राउ गर्न नसकेको भए पनि अनुसन्धान जारी रहेको जनाएको छ।