सामान्य वेबसाइट समेत नभएको विशाल बजारको सेयरभाउ दैनिक किन बढिरहेको छ ?

काठमाण्डौ । नेपाल सरकारको स्वामित्व रहेको विशाल बजार कम्पनी नेप्सेको कारोबार समूहमा सूचीकृत कम्पनीमध्येको एक सरकारी कम्पनी हो । पछिल्लो समय यो कम्पनीको सेयरमूल्य ह्वात्तै बढेको छ । कुनै विशेष कारणबिना नै यो कम्पनीको सेयरमूल्य पछिल्लो समय निकै बढिरहेको छ ।  

यसरी सेयरमूल्य बढ्नलाई न कम्पनीले लाभांश घोषणा गरेको छ न वित्तीय प्रतिवेदन नै सार्वजनिक गरेको छ । कम्पनीले वित्तीय अवस्था सार्वजनिक नगरेको पनि धेरै भइसकेको छ ।  

कम्पनी यति अव्यवस्थित छ कि आजको डिजीटल दुनियाँमा समेत यसको आफ्नै वेबसाइट छैन ।  

सामान्यतया पब्लिकमा गएका कम्पनीले सर्वसाधारणलाई विभिन्न गतिविधिहरुको विषयमा जानकारी दिनलाई वेबसाइटको व्यवस्था गरेका हुन्छन् । तर यो कम्पनीले वेबसाइट नै नराखेर कम्पनीको व्यवस्थापन तथा सञ्चालकमा  को छ, वित्तीय अवस्था के कस्तो छ भन्ने विषयमा सर्वसाधारणलाई गुमराहमा राख्दै आएको छ ।  

यो कम्पनीले वर्षौदेखि वार्षिक साधारणसभा पनि गर्न सकेको छैन ।  

पछिल्लोसमय यस कम्पनीको स्वामित्वमा रहेको जग्गा सेयरमा परिणत भएपछि नेप्सेमा सबैभन्दा उच्च पूँजी भएको  कम्पनी हुन पुगेको छ । यससँगै कम्पनीले उच्च पूँजीको मामिलामा नेपाल टेलिकम र नबिल बैंकलाई पछि पारेको छ ।  

यो कम्पनीको बजार पूँजीकरण उच्च भएता पनि फ्लोटेड सेयर कम भएका कारण नै दोस्रो बजारमा उच्च मूल्य हुन पुगेको देखिन्छ । सर्वसाधारणतर्फ जम्मा १.०४ प्रतिशत अर्थात जम्मा ४ लाख १८ हजार ९६७ कित्ता सेयर मात्रै सूचीकृत छ ।  

यहि लो क्याप सेयर भएका कारण यो कम्पनीको सेयर पछिल्लो  तीन दिनदेखि दैनिक अपर सर्किट लागेको ब्रोकर हाउसमा भेटिएका लगानीकर्ताहरु बताउँछन् ।  

बजारमा नै केही लगानीकर्ताहरुले यस कम्पनीको मूल्य समायोजन हुनुपर्ने तथा हाल सर्वसाधारणमा जम्मा १ प्रतिशत मात्रै सेयर भएका कारण थप सेयर अर्थात सर्वसाधारणतर्फको हिस्सा बढाउने गरी एफपीओ पनि ल्याउनुपर्ने तर्क गरेको पाइन्छ ।  

नेप्सेका प्रवक्ता मूराहरि पराजुलीले नेप्सेले युजर आईडी र पासवर्ड उपलब्ध गराएको तर कम्पनीेले नै आफ्नो वेबसाइट बनाउन तथा सूचना राख्न आलटाल गरेको बताए ।  

नेप्सेकै अर्का एक अधिकारीले सरकारी संस्था भएका कारण नै विशाल बजारले नेप्सेलाई नटेरेको बताए । ती अधिकारीले भने, ‘राष्ट्रिय बीमा कम्पनी र विशाल बजार कम्पनीले नेप्सेलाई मात्रै होइन, मन्त्रीलाई समेत टेर्दैनन् ।’