रु. ५०० सम्मको फण्ड ट्रान्स्फरमा अब कारोबार शुल्क नलाग्ने

काठमाण्डौ । डिजिटल भुक्तानीलाई प्रवद्र्र्धन गर्नुका साथै सानो रकमका भुक्तानीहरु डिजिटल माध्यमबाट गर्न प्रोत्साहन गर्ने उद्देश्यका साथ एनसीएचएलले रिटेल पेमेन्ट स्विच(आरपीएस)मार्फत् हुने रु ५०० सम्मको फण्ड ट्रान्स्फरमा कुनै शुल्क नलाग्ने व्यवस्था गरेको छ । कनेक्ट आईपीएसको वेब÷मोबाईल एप,बैंक वित्तिय संस्थाको मोबाईल बैंकिङमा रहेको कनेक्ट आईपीएस फण्ड ट्रान्स्फर तथा कनेक्ट आईपीएसमार्फत मोबाईल वालेटमा गरिने क्यास इन/आउट लाई पूर्ण रुपमा निःशुल्क गरिएको छ ।  

चैत्र १९ गतेबाट उक्त व्यवस्था कनेक्ट आईपीएसमा कार्र्यान्वयनमा आइसकेको छ भने बैंक वित्तीय संस्था र वालेटहरुले आफ्ना प्रणालीहरुमा आवश्यक व्यवस्था मिलाए पछी मोबाइल बैंकिङ तथा वालेटमा पनि क्रमिक रूपमा लागू हुनेछ । आरपीएसमार्फत हुने अन्य च्यानलहरु र कारोबारहरुमा भने कारोबार रकमको आधारमा हाल कायम रहेको रु. २ र रु.८ कारोबार शुल्कको व्यवस्था यथावत रहने छ । साथै उक्त कारोबार शुल्कमा कानूनबमोजिमको भ्याट थप हुने व्यवस्था रहेको छ ।  

कारोबार संख्यामा वृद्धीसँगै कारोबार शुल्क समायोजन गर्ने नीति एनसीएचएलले लिँदै आएको छ । आरपीएसमार्फत गत आर्थिक वर्षमा ने. रु. ५,६९७ अर्ब बराबरको ७ करोड ५६ लाख भुक्तानी कारोबारहरु फर्छ्यौट गरेको थियो भने चालू आर्थिक वर्षको आठ महिनामा ने. रु. ४,५५३ अर्ब बराबरको ६ करोड ८३ लाख भुक्तानी कारोबारहरु फर्छ्यौट गरिसकेको छ ।  

हाल ५२ बैंक वित्तीय संस्थाहरुको मोबाईल बैंकिङ एपमा आरपीएस÷कनेक्ट आईपीएसबाट फण्ड ट्रान्स्फर गर्न सकिने सेवा उपलब्ध रहेको छ भने १३ भन्दा बढि वालेटहरुमा बैंक खाताबाट क्यासइन÷आउटको सेवा उपलब्ध रहेको छ ।  

एनपीएसअन्तर्गतको आरपीएसले बैंक वित्तीय संस्था पीएसपी÷पीएसओलगायतका संस्थाहरुलाई ओपन एपीआईको माध्यमबाट रियल टाइम भुक्तानीहरु गर्न सकिने प्ल्याट्फर्म प्रदान गर्दै आएको छ । आरपीएसमा रु २० लाखप्रति कारोबार सीमा रहेको छ भने च्यानल तथा युजेज केसेस् बमोजिम एउटै बैंकमा गरिने कारोबारको उक्त सीमारु १ करोड प्रति कारोबारसम्म रहेको छ ।