ट्रम्प भन्छन्, पुटिन पूर्ण रुपमा पागल भईसके, रुसमाथि थप प्रतिबन्ध लाग्छ’

काठमाण्डौ । अमेरिकी राष्ट्रपति डोनाल्ड ट्रम्पले रुसले युक्रेनमा लगातार गरेको बमबारीप्रति असन्तुष्टि व्यक्त गरेका छन् । उनले रुसी राष्ट्रपति भ्लादिमिर पुटिन ‘पूरै पागल’ भएको बताएका छन् ।

ट्रम्पले रुसमाथि थप प्रतिबन्ध लगाउने विचार गरिरहेको बताएका छन् । पुटिनको बारेमा ट्रम्पले आफ्नो ट्रुथ सोशल अकाउन्टमा पोस्ट गरेका छन्, ‘रुसका भ्लादिमिर पुटिनसँग मेरो सधैं राम्रो सम्बन्ध रहेको छ, तर उनलाई केही भएको छ, उनी एकदमै पागल भएका छन् ! उनले अनावश्यक रूपमा धेरै मानिसहरूलाई मारिरहेका छन्, र म केवल सैनिकहरूको बारेमा कुरा गरिरहेको छैन। बिना कारण युक्रेनी सहरहरूमा मिसाइल र ड्रोनहरू प्रहार भइरहेको छ।!

ट्रम्पले लेखे, ‘मैले सधैं भनेको छु कि उसले युक्रेनको एक टुक्रा मात्र होइन, सबै युक्रेन चाहन्छ, र म सायद सही साबित गर्दैछु, तर यदि उसले त्यसो गर्यो भने यसले रुसको पतन निम्त्याउँछ ।’  

डोनाल्ड ट्रम्पले युक्रेनी राष्ट्रपति भोलोडिमिर जेलेन्स्कीप्रति पनि टिप्पणी गरेका छन् । उनले भने, ‘राष्ट्रपति जेलेन्स्कीले बोल्ने तरिकाले आफ्नो देशलाई कुनै फाइदा गर्दैनन्। उनको मुखबाट निस्कने हरेक कुराले समस्या निम्त्याउँछ, मलाई यो मन पर्दैन र यसलाई रोक्नु राम्रो हुनेछ।’

यसअघि युक्रेनका राष्ट्रपति भोलोडिमिर जेलेन्स्कीले अमेरिकाको ‘मौन’ले रुसी राष्ट्रपति भ्लादिमिर पुटिनलाई प्रोत्साहन गरिरहेको बताएका थिए ।  

ट्रम्पले आफ्नो पोस्टमा पूर्व अमेरिकी राष्ट्रपति जो बाइडेनलाई पनि निशाना बनाएर लेखेका छन्, ‘यो यस्तो युद्ध हो जुन म राष्ट्रपति भएको भए सुरु हुने थिएन । यो जेलेन्स्की, पुटिन र बाइडेनको युद्ध हो, ट्रम्पको होइन। म स्पष्ट अक्षमता र घृणाबाट सुरु भएको ठूलो संकटको सामना गर्न मद्दत गर्दैछु।!