सेयरबजार घट्दा म्युचुअल फण्डहरुले ब्यहोरे रु.१.२५ अर्ब घाटा, सबैको न्याभ घट्यो

Capital Market
बिहीबार, आश्विन २३,२०८२ 14:34:07

काठमाण्डौ । म्युचुअल फण्डहरुले एक अर्ब भन्दा बढी घाटा ब्यहोरेका छन् । सञ्चालनमा रहेका ४५ म्युचुअल फण्डले भदौ मसान्तसम्म एक अर्ब ३५ करोड ३३ लाख रुपैयाँ घाटा ब्यहोरेका हुन् ।

साउन महिनामा भने फण्डहरुले ९ करोड १२ लाख ६१ हजार रुपैयाँ नाफा कमाएका थिए । भदौ मसान्तसम्म ७ वटा म्युचुअल फण्डले मात्रै नाफा कमाएका छन् भने ३८ वटा फण्ड घाटामा देखिएका छन् ।

सो अवधिसम्म ७ वटा फण्डले १५ करोड ४७ लाख ५८ हजार रुपैयाँ नाफा कमाएका छन् भने ३७ फण्डले १ अर्ब ५० करोड ८१ लाख रुपैयाँ घाटा ब्यहोरेका छन् । समग्रमा म्युचुअल फण्डहरु एक अर्ब ३५ करोड रुपैयाँ घाटामा देखिएका हुन् ।

सेयरबजार ह्वात्तै घट्दा भदौ महिनामा म्युचुअल फण्डहरुले घाटा ब्यहोर्न पुगेका हुन् । साउन महिनाको अन्तिम कारोबार दिन २७९० विन्दुमा रहेको नेप्से परिसूचक भदौ महिनाको अन्तिम कारोबार दिनसम्म घटेर २७०८ विन्दुमा कायम भएको छ । यसर्थमा एक महिनाको अन्तरालमा सेयरबजार ३ प्रतिशतले घट्दा म्युचुअल फण्डहरुले नोक्सानी ब्यहोर्न पुगेका हुन् ।

सेयरबजारमा म्युचुअल फण्डहरुको ठूलो लगानी रहेको हुन्छ । बजारमा उतारचढाव आउँदा फण्डहरुको वित्तीय अवस्था नै फेरबदल हुने अवस्था आउँछ । सेयरबजार घट्दा फण्डहरुको नाफासँगै प्रतिइकाई खुद सम्पत्ति मूल्य (न्याभ), लगानीको भ्यालु समेत घटबढ हुने अवस्था आउँछ । भदौ महिनामा सेयरबजार ठूलो अंकले घट्दा फण्डहरुको नाफा, न्याभ र लगानीमा समेत प्रभाव पारेको छ ।

सो अवधिसम्म नाफामा रहेका म्युचुअल फण्डहरुमा सनराइज फोकस्ड इक्विटी फण्ड, सिटिजन्स सुपर ३० म्युचुअल फण्ड, लक्ष्मी भ्यालु फण्ड–२, एनआइसी एशिया फ्लेक्सी क्याप फण्ड, सनराइज फर्स्ट म्युचुअल फण्ड, सानिमा ग्रोथ फण्ड र लक्ष्मी उन्नती कोष रहेका छन् । सबैभन्दा बढी नाफा कमाउनेमा सनराइज फोकस्ड इक्विटी फण्ड रहेको छ । यो फण्डले ४ करोड २७ लाख रुपैयाँ नाफा कमाएको छ ।

त्यस्तै, सबैभन्दा बढी धेरै घाटा ब्यहोर्ने फण्डमा भने एनआइबीएल सहभागीता फण्ड रहेको छ । यो फण्डले भदौ महिनासम्म २३ करोड ४७ लाख ९ हजार रुपैयाँ घाटा ब्यहोरेको छ ।

सबैको न्याभ घट्यो

म्युचुअल फण्डहरुको नाफासँगै प्रतिइकाई खुद सम्पत्ति मूल्य (न्याभ) पनि घटेको छ । सञ्चालनमा रहेका ४५ वटै फण्डको न्याभ भदौ महिनामा घटेको छ । यसअघि १३ रुपैयाँसम्म पुगेको न्याभ भदौमा घटेरे सबैको १० रुपैयाँ भन्दा तल झरेको छ ।

म्युचुअल फण्डहरुले लगानी गरेका सम्पत्तिको मूल्यबाट दायित्वहरु घटाएर बाँकी रहेको रकमलाई कुल युनिट संख्याले भाग गर्दा पाइने मूल्य नै न्याभ हो । न्याभ घट्दा लगानीको मूल्य पनि घटेको मान्न सकिन्छ । जस्तै, तपाईले प्रतिइकाई १० रुपैयाँमा १०० इकाई फण्ड खरिद गर्नुभयो भने तपाईको कुल लगानी एक हजार रुपैयाँ हुन्छ, यदि न्याभ घटेर ९ रुपैयाँ भयो भने तपाईको लगानी मूल्य ९०० हुन जान्छ अर्थात् तपाईलाई सय रुपैयाँ घाटा भएको मान्न सकिन्छ ।

भदौ महिनासम्म ३१ वटा म्युचुअल फण्डको न्याभ १० रुपैयाँ हाराहारीमा रहेको छ भने १४ वटा म्युचुअल फण्डको न्याभ ९ रुपैयाँ हाराहारीमा रहेको छ ।

सेयरबजारमा रु.४८ अर्ब २० करोडको लगानी

म्युचुअल फण्डहरुको सेयरबजारमा ४८ अर्ब २० करोड ८३ लाख रुपैयाँ लगानी रहेको छ । यो लगानी रकम साउन महिनाको तुलनामा ०।६२ प्रतिशत कम हो । साउनमा फण्डहरुको सेयरबजारमा ४८ अर्ब ५१ करोड रुपैयाँ लगानी रहेको थियो ।

सो अवधिसम्म २० म्युचुअल फण्डको मात्रै सेयरबजारमा गरेको लगानी भ्यालु बढेको छ भने २५ फण्डको लगानी भ्यालु घटेको छ ।

भदौमा सबैभन्दा बढी सेयरबजारमा लगानी गर्ने म्युचुअल फण्डमा एनआइबीएल सहभागीता फण्ड रहेको छ । यो फण्डको कुल ६ अर्ब १३ करोड रुपैयाँ सेयरबजारमा लगानी रहेको छ । यो लगानी साउन महिनाको तुलनामा २.१५ प्रतिशत बढी हो ।

त्यस्तै, सबैभन्दा थोरै लगानी गर्ने म्युचुअल फण्डमा शुभ लक्ष्मी कोष रहेको छ । यो फण्डको जम्मा ४० करोडा १० लाख रुपैयाँ मात्रै सेयरबजारमा लगानी रहेको छ ।