ग्राउण्ड जिरो: लगानीकर्तामा मौद्रिक नीतिको चर्चा, भन्छन्, ‘अब बैंक र इन्स्योरेन्स बढ्छ’

काठमाण्डौ । हरेक साताको आइतबार हामीले नियमित स्तम्भ ‘ग्राउण्ड जिरो’ पस्किदै आएका छौं । आजपनि सोही स्तम्भलाई निरन्तरता दिने क्रममा विभिन्न ब्रोकर हाउसहरुमा पुगेर लगानीकर्ता तथा ब्रोकर कर्मचारीहरुको विचार बुझ्ने प्रयास गरेका छौं ।

आज हामीले बागबजार, न्युप्लाजा, घट्टेकुलो र अनामनगर आसपासका केही ब्रोकर हाउसहरुमा पुगेर लागनीकर्ताको मनोबल बुझ्ने कोसिस गरेका छौं ।

गत साताभरी बढेको बजार आज पनि कारोबार खुलेलगत्तै सामान्य अंकले बढ्न पुगेको थियो । प्रायः सबै ब्रोकर हाउसमा उपस्थित लगानीकर्ताहरुमा आज छुट्टै किसिमको उत्साह देखिन्थ्यो । अस्थिर राजनीतिक अवस्थाले प्रतिकुल असर पारेको सेयरबजार अब माहोल राम्रो बन्दै जाँदा बढ्न सक्ने आँकलन लगानीकर्ताहरुले गरेका थिए ।

साथै, नेपाल राष्ट्र बैंकले आजभोलिमै मौद्रिक नीति समिक्षा सार्वजनिक गर्ने र लगानीकर्ताहरुले राखेका केही माग सम्बोधन हुने लगानीकर्ताहरुले अपेक्षा व्यक्त गरेका थिए ।  

अनलाइन सेक्युरिटिजः ‘अब बैंक र इन्स्योरेन्स चल्न सक्छ’

सर्वप्रथम हामी बागबजारस्थित अनलाइन सेक्युरिटिज (ब्रोकर नं. ४९) पुग्यौं । नेप्से परिसूचक सामान्य अंकले बढेको थियो । लगानीकर्ताहरुको उपस्थिति राम्रै थियो ।

तर सबैजन आ–आफ्नै मोबाइलमा व्यस्त देखिन्थे । दुईजना लगानीकर्ता भने एकआपसमा मौद्रिक नीति र विभिन्न स्क्रिप्टका विषयमा गफिदै थिए । त्यत्तिकैमा उक्त ब्रोकर हाउसमा कार्यरत कर्मचारीको फोन बज्यो । ती कर्मचारीले फोनमा कुरा गर्दै विभिन्न स्क्रिप्टरुका विषयमा कुरा गर्दै थिए ।

उनले भने, ‘दाई अब मौद्रिक नीतिको समीक्षा आज–भोलिमा सार्वजनिक हुने कुरा छ, अब बैंक र लाइफ इन्स्योरेन्स बढ्ने चान्स बढी छ । अहिले आफुसँग भएका बैंकका सेयरहरु नबेच्नुस केही समय होल्ड गर्नुस् ।’

ती कर्मचारीले आफ्ना दाईलाई थप अन्य बैंकको सेयर किन्न सुझाव दिइरहेका थिए । ‘अहिले बैंकमा एनएमबी र लक्ष्मी सनराइज बैंक किन्दा फाइदा हुन्छ, यी कम्पनीहरुको सेयरभाउ सस्तो पनि छ र अब बढ्ने चान्स पनि हाई छ’ उनले भने, ‘यसबाहेक लाइफ इन्स्योरेन्समा हाई क्याप कम्पनीहरु पनि किन्दा हुन्छ ।’

दिव्या सेक्युरिटिजः सेयर कर्नरिङले म फँसे

दोस्रोमा हामी न्यूप्लाजास्थित दिव्या सेक्युरिटिज (ब्रोकर नं.५९) पुग्यौं । उक्त ब्रोकर हाउसमा लगानीकर्ताको उपस्थिति न्युन थियो ।

एकछिनपछि एकजना लगानीकर्ता आएर उक्त ब्रोकर हाउसको कर्मचारीसँग गफ गर्न थाले । उनले सेयर कर्नरिङका कारण आफुले ठूलो घाटा ब्यहोर्नु परेको कुरा कर्मचारीलाई सुनाउँदै थिए ।

‘सेयर खेलाडीहरुले सेयर कर्नरिङ गर्दा मैले नबुझेरै लगानी गर्दा ठूलो घाटा खानु पर्यो, एनआरएन इन्फ्रास्ट्रक्चर र गार्डियन माइक्रो लाइफ इन्स्योरेन्सको सेयरमा लगानी गर्दा आफुले लाखौं घाटा खानुपर्यो’ उनले भने, ‘अब सागर डिष्टिलरीको सेयर पनि त्यस्तै गर्ने देख्छु, बढाएर २४/२५ सय पुर्याउँछन् अनि अरुलाई भिडाएर बाठा भाग्छन् ।’

कर्मचारीले भने ती लगानीकर्तालाई लाइफ इन्स्योरेन्स अहिले किन्दा उपयुक्त हुने सुझाव दिदै थिए । उनले नेपाल लाइफ इन्स्योरेन्सको सेयर किन्दा फाइदा हुन सक्ने सुझाव दिएका थिए ।

भिजन सेक्युरिटिजः मौद्रिक नीतिको चर्चा

त्यसपछि हामी अनामनगरस्थित भिजन सेक्युरिटिज (ब्रोकर नं. ३४) पुग्यौ । प्रायजसो लगानीकर्ताहरु आ–आफ्नै मोबाइल चलाउन व्यस्त देखिन्थे । एकजना लगानीकर्ता भने फोनमा व्यस्त देखिन्थे ।

उनले फोनमा बोल्दै बोनस सेयरका कुरासँगै जोशी हाइड्रोपावरको सेयर किन्ने बेला भएको बताउँदै थिए । ‘अहिले घटेको सेयरहरु किनेर राख्नुपर्छ अब भोलिसम्ममा मौद्रिक नीति आउने कुरा छ, सकेसम्म आजै राम्रा कम्पनीहरु किनेर राख्नुस’ उनले भने, ‘सागर डिष्टिलरीको सेयर सेलमा आएको छैन नत्र किनेर राख्न पाए हुन्थ्यो, आज धेरैले किनेका छन्, तपाई पनि सक्नुहुन्छ भने किनेर राख्नुस ।’

साथै, अर्को कर्नरमा बसेका दुईजना लगानीकर्ता पनि मौद्रिक नीतिको विषयमा नै गफ गर्दै थिए । त्यत्तिकैमा एकजना लगानीकर्ताले भने, ‘आज कारोबार मज्जाले बढ्न थालेको छ, मौद्रिक नीतिको प्रभाव हुन सक्छ’ उनले थपे, ‘मौद्रिक नीति राम्रै आउला जस्तो छ, मागहरु त धेरै छैन तर बैंकहरुले सेयर किन्न पाउने वातावरण मात्रै सहज बनाउने हो भने बजार माथि जान्छ ।’

आर्यतारा इन्भेष्टमेन्ट एण्ड सेक्युरिटिजः यो हप्ताभरी बजार घट्न सक्छ

अन्त्यमा हामी अनामनगरमा रहेको आर्यतारा इन्भेष्टमेन्ट एण्ड सेक्युरिटिज (ब्रोकर नं.५७)मा पुग्यौं । उक्त ब्रोकरहाउसमा महिला लगानीकर्तासहित बाक्लो उपस्थिति थियो ।

सबैजना एकआपसमा गफ गर्दै थिए । त्यो बेलासम्म नेप्से परिसूचक सामान्य अंकले घट्न पुगिसकेको थियो । एकजना महिला लगानीकर्ताले आज सेयरबजार १० अंक जतिले घट्न सक्ने भन्दै आँकलन गरिरहेकी थिइन् ।

‘हेर्दाहेर्दै सबै राता मकै भयो, आज बजार दोहोरो अंकले घट्न सक्ने सम्भावना देखियो, आज घट्यो भने भोलि पनि अवश्य घट्ने देखिन्छ’ उनले भनिन्, ‘सेयरबजार रातो भयो भने त सबै आत्तिहाल्छन् अनि बेच्न थाल्छन्, यसरी त मार्केट घटिहाल्छ नि !’

उनको कुरालाई समर्थन गर्दै अर्की महिला लगानीकर्ताले भनिन्, ‘आजको बजार घट्नको कारण सबैजना आत्तिएर बेच्नु नै हो, अलिकति घट्न थाल्यो कि सबै आत्तिहाल्छन्’ उनले थपिन्, ‘हुन त गत साताभरी बजार बढेको छ त्यसैको नाफा बुक पनि हुन सक्छ आज ।’

एकजना लगानीकर्ता भने दुर्गा प्रसाईसँग भडास पोख्दै थिए । उनले भने, ‘यो दुर्गा प्रसाई पनि पागल जस्तै लाग्छ, अनेकथरि बोल्छ, नेपालको अर्थतन्त्र तहसनहस पार्ने मुख्य नाइसे नै यहि हो जस्तो लाग्छ’ उनले भने, ‘नेपालको सेयरबजार माथि उक्लिन नसक्नुको कारण यो पनि हो ।’

अर्का पाका जस्तो देखिने लगानीकर्ता भने बैंकको सेयर बढ्न सक्ने अनुमान लगाउँदै थिए । ‘अहिले सस्तो र राम्रो बैंकमा लगानी गर्नका लागि लक्ष्मी सनराइज बैंकको सेयर उपयुक्त हुन्छ जस्तो देखियो’ उनले भने, ‘अब मौद्रिक नीतिमा बैंकलाई राम्रो हुने कुरा आयो भने त यो बैंकको सेयर किन्दा फाइदा देख्छु, बोनस पनि १० प्रतिशत छ र सेयरभाउ पनि निकै सस्तो छ ।’