सेयरबजार ३१.१२ अंकले वृद्धि, फाइनान्स समूहमा आकर्षण

काठमाण्डौ । साताको पहिलो कारोबार दिन आज सेयरबजार दोहोरो अंकले बढेको छ । आज नेपाल स्टक एक्सचेञ्च(नेप्से) परिसूचक १.१७ प्रतिशत अर्थात ३१.१२ अंकले बढेर २ हजार ६७२.५५ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.०३ प्रतिशतले बढेर ४५९.४३ विन्दुमा पुगेको छ । यो दिन नेप्सेमा सूचीकृत मध्ये ३३८ वटा स्क्रिप्टको १ करोड ६६ लाख ११ हजार ४७९ कित्ता सेयर ८ अर्ब ४० करोड २७ लाख रुपैयाँभन्दा बढीको कारोबार भएको छ ।

आजको बजारबारे बजार जानकार अजय सिं थापा (जय शम्भु)भन्छन्, ‘आजको बजार बढ्नुको मुख्य कारण नेपाली कांग्रेस पार्टी टुक्रिएको र गगन थापाको पक्षमा फैसला हुँदा लगानीकर्ताहरु उत्साहित भएका हुन् । साथै मंगलबार सर्वोच्चले थापाकै पक्षमा फैसला गर्यो भने बजार ३ हजार २८ सय माथि जान्छ भन्ने आाम लगानीकर्ताहरुको आशा छ । बजार अहिले एक लेभल माथि आइसकेको छ । लगानीकर्ताहरु नयाँ स्टकहरुमा आकर्षित देखिएका छन्, जसकारण आज भोल्युम पनि उल्लेख्य बढेको देखिन्छ । यदि चुनाव समयमै हुने हो भने बजार अझै माथि जाने सम्भावना छ । यदि बजारमा १८–२० अर्बको कारोबार हुने हो भने नेप्से सूचक ३ हजार वा ३२ सय विन्दुमाथि जान सक्ने सम्भावना रहन्छ ।’

त्यस्तै, अर्का बजार जानकार सुवास चन्द्र ढुंगाना भन्छन्, ‘पुष मसान्तको दबाब सकिने बित्तिकै बजार राम्रो बढेको छ । यो बजार बढ्नु स्वभाविक पनि हो । बजार बढ्नका लागि त्यस्ता नकारात्मक पक्षहरु केही छैनन् । चुनावी माहोल छ, समयमै चु्नाव हुने हो भने लगानीकर्ताहरु अझै उत्साहित हुनेछन् र बजार माथि जान्छ ।’

यो दिन नेप्सेमा सूचीकृत १३ वटै समूहमा हरियाली छायो । आज फाइनान्स  समूह सर्वाधिक अर्थात ५.७३ प्रतिशतले बढ्यो । यस्तै विकास बैंक समूह ३.०३ प्रतिशत, होटल २.०२, हाईड्रो ०.७०, लगानी ०.९३, जीवन बीमा १.२५, उत्पादन तथा प्रशोधन २.४२, लघुवित्त १.३१, म्युचुअल फण्ड ०.५१, निर्जीवन बीमा ०.६८, अन्य ०.४५ र व्यापार समूह ०.५४ प्रतिशतले बढ्यो ।

धेरै कारोबार गर्ने कम्पनीहरु

आज मन्जुश्री फाइनान्सको सर्वाधिक सेयर कारोबार भयो । आज यो कम्पनीको ५३ करोड १६ लाख बढीको सेयर कारोबार भयो ।

यस्तै, एसवाई प्यानलको ३७  करोड ३९ लाख, श्रीनगर एग्रीटेकको २८ करोड ४५ लाख, बन्दीपुर केवलकारको २५ करोड ८३ लाख र राधी विद्युतको २४ करोड ९४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका चारवटा कम्पनीको सेयरमूल्यमा अपर सर्किट लाग्यो। आज सागर डिस्टिलरी, उन्नती सहकार्य लघुवित्त, श्रीनगर एग्रीटेक र गोर्खाज फाइनान्सको सेयरमूल्यमा अपर सर्किट लाग्यो । यसैगरी, आज सेन्ट्रेल फाइनान्सको सेयरमूल्य ८.८८, गुराँस लघुवित्तको ८.८६ र बन्दिपुर केवलकारको ७.४७ प्रतिशतले सेयरमूल्य बढ्यो ।

थ्रीस्टार हाईड्रोको सेयरमूल्य सर्वाधिक अर्थात ८.७८ प्रतिशतले घट्यो।