स्थल आक्रमणको चर्चाबीच इरानको चेतावनी: 'अमेरिकी सैनिकको व्यग्र प्रतिक्षामा छौं, आगो ओकल्नुछ !'

तेहरान । अमेरिका र ईरानबीच बढ्दो तनावका बीच ईरानले सम्भावित अमेरिकी जमिनी हमलाबारे कडा चेतावनी दिएको छ। 

ईरानी अधिकारीहरूले स्पष्ट रूपमा भनेका छन् कि यदि अमेरिकी सैनिकहरूले ईरानी भूमिमा पाइला राखे भने उनीहरू “शव बाकसमा मात्र फर्किनेछन्।”

भारतस्थित ईरानी दूतावासले तेहरान टाइम्स को विशेष संस्करणको एक पृष्ठ सार्वजनिक गर्दै “जहन्नममा तिमीहरूको स्वागत छ” भन्ने सन्देश प्रवाह गरेको छ। उक्त सामग्रीमा ईरानको भूमिमा प्रवेश गर्ने अमेरिकी सैनिकहरूको अवस्था गम्भीर हुने चेतावनी दिइएको छ।

ईरानका संसद् अध्यक्ष मोहम्मद बागेर गालिबाफले युद्धको ३०औँ दिन सम्बोधन गर्दै अमेरिका प्रति आक्रामक टिप्पणी गरेका छन्। उनले भने, “अमेरिकाले सार्वजनिक रूपमा वार्ताको कुरा गरे पनि पर्दा पछाडि जमिनी हमलाको योजना बनाइरहेको छ। हाम्रा सेनाहरू उनीहरूको आगमनको प्रतीक्षामा छन्।”

यो चेतावनी अमेरिकी सञ्चारमाध्यम वाशिङ्टन पोस्ट मा प्रकाशित एक रिपोर्टपछि आएको हो, जसमा पेन्टागनले केही सातासम्म ईरानमा सम्भावित जमिनी कारबाहीको तयारी गरिरहेको उल्लेख गरिएको छ। त्यससँगै अमेरिकाले खाडी क्षेत्रमा सैन्य उपस्थिति पनि बढाएको छ। अमेरिकी सेन्ट्रल कमान्डका अनुसार युद्धपोत यूएसएस त्रिपोली क्षेत्रमै तैनाथ गरिएको छ, जसमा करिब ५ हजार सैनिक रहेका छन्।

पछिल्लो २४ घण्टामा मध्यपूर्व क्षेत्रको अवस्था झनै तनावपूर्ण बनेको छ। साउदी अरबले १० वटा ड्रोन खसालेको जनाएको छ भने संयुक्त अरब इमिरेट्स र कुवेतमा रातभर आक्रमण भएको खबर आएको छ। कतारको टेलिभिजन नेटवर्क अल अरबीको तेहरानस्थित कार्यालयमा समेत मिसाइल प्रहार भएको बताइएको छ।

यसबीच पाकिस्तानले अमेरिका र ईरानबीच वार्ताको मध्यस्थता गर्न प्रस्ताव गरेको छ। साथै, मिस्र, साउदी अरब र टर्कीका विदेश मन्त्रीहरू पाकिस्तानमा भेला भई क्षेत्रीय अवस्थाबारे छलफल गरिरहेका छन्।

उल्लेखनीय छ, अमेरिका–ईरानबीचको तनाव गत वर्ष परमाणु वार्ताका क्रममा चर्किएको थियो। त्यसपछि ईरान र इजरायलबीच १२ दिन लामो युद्ध भएको थियो भने अमेरिकाले ईरानका तीन परमाणु केन्द्रमा आक्रमण गरेको थियो।

ईरानले अन्त्यमा स्पष्ट सन्देश दिएको छ: “हामी कुनै अपमान स्वीकार गर्दैनौं, हाम्रो धारणा प्रस्ट छ।”

(स्रोत: बीबीसी हिन्दी)