सांसद डीपी अर्याल सभामुखमा निर्विरोध, औपचारिक घोषणा हुन बाँकी

काठमाण्डौ । सांसद डीपी अर्याल सभामुख पदका लागि निर्विरोध निर्वाचित भएका छन्, यद्यपि उनको औपचारिक घोषणा भने हुन बाँकी छ ।

आज बिहान ११ बजेदेखि दिउँसो २ बजेसम्म मनोनयन दर्ताको समय तोकिएको थियो । सो अवधिमा अर्यालको मात्रै उम्मेदवारी परेको हो ।

प्रतिनिधिसभा नियमावलीको नियम ७ अनुसार, यदि सभामुख पदमा एक जनामात्र उम्मेदवार हुन्छ भने प्रतिनिधिसभामा समर्थक सदस्यले प्रस्ताव प्रस्तुत गरेपछि बैठकको अध्यक्षता गर्ने व्यक्तिले उक्त उम्मेदवारलाई निर्विरोध निर्वाचित भएको घोषणा गर्ने व्यवस्था छ । यस्तो घोषणा अब बस्ने प्रतिनिधिसभाको बैठकमा गरिनेछ, जुन आगामी आइतबारका लागि तय गरिएको छ ।

सभामुख चयन भएपछि उपसभामुखको निर्वाचन प्रक्रिया अगाडि बढाइनेछ । उपसभामुखको निर्वाचन सभामुखले तोकेको मिति र समयमा हुनेछ ।

संसद् सचिवालयका अनुसार सभामुख र उपसभामुख फरक दल र फरक लिंगका हुनुपर्ने प्रावधान छ । तर एकल उम्मेदवारी परेको अवस्थामा एउटै दलबाट पनि हुन सक्ने व्यवस्था रहेको छ ।

हालसम्म उपसभामुखको विषयमा कुनै ठोस छलफल भएको छैन । प्रतिनिधिसभामा रास्वपासहित ६ वटा दलको उपस्थिति छ ।