अपडेट हुँदैनन् सरकारी वेबसाइट, उठ्दैन फोन: सुधार्न प्रधानमन्त्री नै अघि सरे !

काठमाण्डौ । प्रधानमन्त्री तथा मन्त्रिपरिषद्को कार्यालयले देशभरका सरकारी निकायलाई आफ्ना वेबसाइटहरू तुरुन्त अद्यावधिक गर्न र सेवाग्राहीका गुनासोमा छिटो प्रतिक्रिया दिन निर्देशन दिएको छ।

बुधबार जारी सूचनामा धेरै कार्यालयका वेबसाइटमा प्रमुख, प्रवक्ता र सूचना अधिकारीको विवरण पुरानो रहेको तथा सम्पर्क नम्बरहरू नउठ्ने गुनासो बढेको उल्लेख गरिएको छ।

यसलाई सुधार गर्न सबै मन्त्रालय, आयोग, प्रदेश र स्थानीय तहलाई कर्मचारीहरूको नाम, मोबाइल नम्बर र इमेल विवरण तत्काल अपडेट गर्न भनिएको छ। साथै, सम्बन्धित जिम्मेवार अधिकारीहरूले कार्यालय समयमा अनिवार्य रूपमा फोन उठाई नागरिकलाई आवश्यक सूचना उपलब्ध गराउन र गुनासोको शीघ्र सम्बोधन गर्नुपर्ने व्यवस्था मिलाउन पनि निर्देशन दिइएको छ।