मोरङको रतुवामाईमा सशस्त्र प्रहरीद्वारा २० लाख भारतीय मुद्रा नियन्त्रण

काठमाण्डौं । मोरङको रतुवामाई नगरपालिका–२ स्थित घररुचोक सीमा क्षेत्रबाट सशस्त्र प्रहरीले ठूलो परिमाणमा भारतीय रुपैयाँ बरामद गरेको छ।

आइतबार राति सीमा सुरक्षा गुल्म बरडंगा र बीओपी डोरियाको संयुक्त टोलीले २० लाख भारतीय रुपैयाँ नियन्त्रणमा लिएको सशस्त्र प्रहरीले जनाएको छ। बरामद रकम ५०० दरका ४० बन्डलमा रहेको थियो।

भारतबाट नेपालतर्फ आउँदै गरेका व्यक्तिहरूलाई शंकास्पद देखिएपछि जाँच गर्ने क्रममा मोटरसाइकल पछाडि सवार व्यक्तिले बोकेको झोला फालेर फरार भएको प्रारम्भिक विवरणमा उल्लेख छ।

सशस्त्र प्रहरीका सहप्रवक्ता डीएसपी शैलेन्द्र थापाका अनुसार बरामद रकम आवश्यक कानुनी प्रक्रिया पूरा गरी सम्बन्धित निकायमा बुझाउने तयारी भइरहेको छ।