विश्व विजेता ब्राजिल र ‘डार्क हर्स’ जापान आज भिड्दै, कसको जित्ने सम्भावना कति ?

काठमाण्डौ। पाँच पटकको विश्व विजेता ब्राजिलले फिफा विश्वकप २०२६ को नकआउट चरणमा सोमबार एसियाली फुटबलको शक्तिशाली टोली जापानसँग प्रतिस्पर्धा गर्दैछ। अमेरिकाको ह्युस्टनमा हुने राउन्ड अफ ३२ को यस खेललाई ब्राजिलका मुख्य प्रशिक्षक कार्लो एन्सेलोटीको नेतृत्वमा टोलीको पहिलो वास्तविक परीक्षा मानिएको छ।

ब्राजिल समूह ‘सी’को विजेताका रूपमा नकआउट चरणमा पुगेको हो। सुरुआती खेलमा मोरक्कोसँग १–१ को बराबरी खेलेको ब्राजिलले त्यसपछि हाईटी र स्कटल्यान्डलाई समान ३–० गोलअन्तरले पराजित गर्दै सात अंकसहित शीर्ष स्थान सुरक्षित गरेको थियो। प्रतियोगिताभर ब्राजिलका स्टार फरवार्ड भिनिसियस जुनियरले चार गोल गरेका छन् भने माथेउस कुञाले तीन गोल गरेका छन्। मिडफिल्डर ब्रुनो गिमारेसले तीन असिस्ट दिएका छन्।

उता, जापानले पनि प्रभावशाली प्रदर्शन गर्दै समूह ‘एफ’बाट उपविजेताका रूपमा अन्तिम ३२ मा स्थान बनाएको छ। जापानले नेदरल्यान्ड्ससँग २–२ र स्विडेनसँग १–१ को बराबरी खेलेको थियो भने ट्युनिसियालाई ४–० ले पराजित गरेको थियो। जापानका आयासे उएदा र दाइची कामादाले समान दुई–दुई गोल गर्दै टोलीको आक्रमणलाई बलियो बनाएका छन्।

खेलअघि आयोजित पत्रकार सम्मेलनमा प्रशिक्षक एन्सेलोटीले जापानलाई विश्वकै उत्कृष्ट टोलीमध्ये एक भन्दै आफ्नो टोली मानसिक रूपमा पूर्ण तयारीमा रहेको बताए। उनका अनुसार नकआउट चरणमा कुनै पनि क्षण खेलको दिशा बदलिन सक्ने भएकाले खेलाडीहरू मानसिक, शारीरिक र रणनीतिक रूपमा तयार हुन आवश्यक छ। उनले ब्राजिल विश्व उपाधिको दाबेदार भए पनि जापानलाई कमजोर आँक्न नहुने स्पष्ट पारे।

जापानका मुख्य प्रशिक्षक हाजिमे मोरियासुले पनि आफ्नो टोलीको एकता नै सबैभन्दा ठूलो शक्ति भएको बताएका छन्। उनले प्रत्येक खेलाडी टोलीका लागि योगदान दिन प्रतिबद्ध रहेको र त्यसैले जापानले फेरि एकपटक ठूलो टोलीलाई चुनौती दिन सक्ने विश्वास व्यक्त गरेका छन्।

दुवै टोलीबीचको विगतको इतिहास हेर्दा ब्राजिल बलियो देखिन्छ। अहिलेसम्म भएका १४ भेटमध्ये ब्राजिलले ११ खेल जितेको छ, दुई खेल बराबरीमा सकिएका छन् भने जापानले केवल एक खेल जितेको छ। तर त्यो एकमात्र जित पनि सबैभन्दा पछिल्लो भेटमा आएको थियो, जब सन् २०२५ को मैत्रीपूर्ण खेलमा जापानले दुई गोलले पछि परेको अवस्थाबाट पुनरागमन गर्दै ब्राजिललाई ३–२ ले हराएको थियो। यस कारण पनि ब्राजिल बदला लिने लक्ष्यसहित मैदानमा उत्रिने अपेक्षा गरिएको छ।

ब्राजिलका विङ्गर राफिन्हा ह्यामस्ट्रिङ चोटका कारण उपलब्ध हुने छैनन्। यद्यपि स्टार खेलाडी नेयमार चोटपछि टोलीमा फर्किएका छन् र जापानविरुद्ध अघिल्लो खेलभन्दा बढी समय मैदानमा रहने सम्भावना रहेको प्रशिक्षक एन्सेलोटीले संकेत दिएका छन्। जापानका प्रमुख खेलाडी ताकेफुसा कुबो भने घुँडाको चोटका कारण खेल गुमाउनेछन्।

तथ्याङ्क विश्लेषण गर्ने संस्था अप्टाको सुपरकम्प्युटरले यस खेलमा ब्राजिलको जित्ने सम्भावना ५८.३ प्रतिशत आँकेको छ भने जापानको जित्ने सम्भावना १८.१ प्रतिशत रहेको जनाएको छ। खेल अतिरिक्त समयसम्म पुग्ने सम्भावना २३.६ प्रतिशत रहेको मूल्यांकन गरिएको छ।

यस खेलको विजेताले अन्तिम १६ मा नर्वे र आइभोरी कोस्टबीचको विजेतासँग प्रतिस्पर्धा गर्नेछ।