१० महिनामा पोलिसी सरेण्डरमार्फत बाहिरियो रु.११.६० अर्ब, नवीकरण नभएको बीमालेख १२ लाखमाथि

काठमाण्डौ । जीवन बीमा कम्पनीहरुबाट पोलिसी सरेण्डरमार्फत साढे ११ अर्ब रुपैयाँ बाहिरिएको छ । नेपाल बीमा प्राधिकरणका अनुसार चालु आवको १० महिनासम्ममा जीवन बीमा कम्पनीहरुबाट ११ अर्ब ६० करोड ९५ लाख रुपैयाँ बराबरको पोलिसी सरेण्डर भएको छ ।  

यो रकम गत आवको सोही अवधिसम्मको तुलनामा भने ५.४० प्रतिशत कम हो । गत आवको १० महिनासम्ममा जीवन बीमा कम्पनीहरुबाट १२ अर्ब २७ करोड २३ लाख रुपैयाँ बराबारको पोलिसी सरेण्डर भएको थियो ।  

यता सरेण्डर भएको पोलिसी संख्या समेत गत आवको तुलनामा १३.७२ प्रतिशत कम भएको छ । गत आवको वैशाख मसान्तसम्म बीमकहरुबाट कुल ८८ हजार ६३५ वटा पोलिसी त्याग भएकोमा चालु आवको सोही अवधिसम्म ७६ हजार ४७७ वटा मात्रै पोलिसी सरेण्डर भएका छन् ।  

पछिल्लो समय जीवन बीमा कम्पनी र नियामक निकाय नेपाल बीमा प्राधिकरणले सरेण्डरदर घटाउन विभिन्न खालका सचेतनामूलक कार्यक्रमहरु आयोजना गर्दै आइरहेका छन् । फलस्वरुप पछिल्लो समय बीमा पोलिसी समर्पण गर्ने वा सरेण्डर गर्नेको संख्या र रकममा सुधार भएको देखिन्छ ।  

यता सरेण्डरदरको अवस्थामा क्रमिक सुधार देखिन थालेपनि जीवन बीमा कम्पनीहरुमा व्यतित हुने बीमालेख रकम भने बढेको देखिएको छ । पोलिसी नवीकरण नहुनु पनि जीवन बीमा कम्पनीहरुको मुख्य समस्याको रुपमा छ ।  

सो अवधिसम्म जीवन बीमा कम्पनीहरुमा व्यतित भएको बीमालेखको रकम ३९ अर्ब ३७ करोड ९४ लाख रुपैयाँ पुगेको छ । यो रकम गत आवको तुलनामा ६.८३ प्रतिशत बढी हो । गत आवको सोही अवधिसम्म यस्तो रकम ३६ अर्ब ८६ करोड १० लाख रुपैयाँ रहेको थियो ।  

नवीकरण नभएको पोलिसी रकम बढेपनि संख्या भने सामान्य घटेको देखिएको छ । वैशाखसम्म नवीकरण नभएको पोलिसी संख्या १२ लाख २४ हजार ४६५ कायम भएको छ । गत आवको सोही अवधिसम्म यस्तो संख्या १२ लाख ५४ हजार ४७८ रहेको थियो ।