खाने तेलमै कैफियत, विभागले रोक्यो ‘तेज’ ब्रान्डको बिक्री

काठमाण्डौं । बजारमा बिक्री भइरहेको ‘तेज’ ब्रान्डको तोरी तेल न्यून गुणस्तरको भेटिएपछि खाद्य प्रविधि तथा गुण नियन्त्रण विभागले उक्त उत्पादन तत्काल बजारबाट हटाउन कडा निर्देशन दिएको छ ।

विभागले रुपन्देहीस्थित सिद्धार्थ आयल इन्डस्ट्रिजद्वारा उत्पादन गरिएको तोरी तेल सरकारी खाद्य मापदण्डअनुसार नभेटिएको भन्दै बिक्री वितरणसमेत रोक्न आदेश जारी गरेको हो ।

विभागका अनुसार नियमित बजार अनुगमनका क्रममा संकलन गरिएको तेलको नमूना प्रयोगशालामा परीक्षण गर्दा गुणस्तर सम्बन्धी विभिन्न सूचकमा कैफियत देखिएको थियो ।  

परीक्षणपछि सम्बन्धित ब्याचको तेल “न्यूनस्तर” को रहेको निष्कर्ष निकालिएको विभागले जनाएको छ ।

खाद्य स्वच्छता तथा गुणस्तर ऐन, २०८१ अनुसार विभागले सम्बन्धित कम्पनीलाई बजारमा पठाइएको उक्त ब्याचको सम्पूर्ण तेल आफ्नै खर्चमा फिर्ता गर्न निर्देशन दिएको छ ।  

साथै उपभोक्ताको स्वास्थ्य जोखिमलाई ध्यानमा राख्दै उक्त तेल बिक्री नगर्न तथा बजारमा उपलब्ध भए हटाउनसमेत भनिएको छ ।

विभागका अनुसार समस्या देखिएको तेल आयातित तोरी प्रयोग गरेर उत्पादन गरिएको थियो ।  

उक्त तेलको उत्पादन मिति २०८२ फागुन २८ रहेको छ भने ब्याच नम्बर २० भएको जनाइएको छ ।  

यसको उपभोग्य अवधि ६ महिना तोकिएको थियो ।

खाद्य प्रविधि विभागले प्रयोगशाला परीक्षणमा तेलका केही महत्वपूर्ण गुणस्तरीय ‘प्यारामिटर’ सरकारले तोकेको न्यूनतम स्तरभन्दा तल देखिएको जनाएको छ । 

यद्यपि कुन सूचकमा समस्या देखिएको हो भन्ने विस्तृत विवरण भने सार्वजनिक गरिएको छैन ।

विभागले उपभोक्तालाई सम्बन्धित ब्याचको ‘तेज’ ब्रान्डको तोरी तेल प्रयोग नगर्न आग्रह गर्दै बजारमा बिक्री भइरहेको भेटिए जानकारी गराउन पनि अनुरोध गरेको छ ।

पछिल्ला महिनाहरूमा बजारमा गुणस्तरहीन खाद्य वस्तु फेला पर्ने घटना बढिरहेका बेला यो घटनाले फेरि खाद्य सुरक्षा, बजार अनुगमन र उपभोक्ता संरक्षण प्रणालीमाथि प्रश्न उठाएको छ ।  

उपभोक्ता अधिकारकर्मीहरूले नियमित अनुगमनलाई थप प्रभावकारी बनाउन, प्रयोगशाला परीक्षणलाई व्यापक बनाउन र गुणस्तरहीन खाद्य उत्पादन गर्ने उद्योगमाथि कडा कारबाही गर्न सरकारसँग माग गरेका छन् ।

विशेषगरी दैनिक उपभोगमा प्रयोग हुने खाने तेलमै गुणस्तर समस्या देखिनुले आम उपभोक्तामा स्वास्थ्य सुरक्षाबारे चिन्ता बढाएको छ ।