मन्त्री अनुपस्थितिमा सांसद राई आक्रोशित, प्रतिनिधि सभा १५ मिनेट स्थगित

काठमाण्डौ । प्रतिनिधिसभाको सोमबारको बैठक सांसद राजेन्द्र राईको कडा आपत्तिपछि केही समयका लागि स्थगित भएको छ।  

बजेटमाथिको छलफलका क्रममा मन्त्रीहरूको अनुपस्थितिलाई लिएर असन्तुष्टि जनाउँदै उनी रोस्टममै उभिएपछि बैठकको कार्यवाही प्रभावित भएको हो।

सोमबारको बैठकमा नौ वटा मन्त्रालयको बजेटमाथि छलफल जारी रहेको थियो।

सभामुख डोलप्रसाद अर्यालले सांसद राईलाई बोल्न समय प्रदान गरेका थिए। उनलाई करिब १० मिनेटको समय दिइएको थियो।

रोस्टममा पुगेपछि सांसद राईले सभामुखलाई सम्बोधन गर्दै मन्त्रालयगत बजेट छलफलमा मन्त्रीहरूको अनिवार्य उपस्थिति नदेखिएकोप्रति आपत्ति जनाए।  

उनले विगतको बैठकमा पनि अर्थमन्त्री अनुपस्थित रहेको स्मरण गराउँदै मन्त्रीहरूको उपस्थितिविना छलफल औपचारिक मात्र हुने टिप्पणी गरे।

उनले भने, “आज पनि नौ मन्त्रालयको बजेटमाथि छलफल भइरहेको छ तर जम्मा दुई जना मन्त्री मात्रै उपस्थित छन्।

यस्तो अवस्थामा हामीले के छलफल गर्ने ? ”

सांसद राईले मन्त्रालयगत बजेटमाथि छलफल चलिरहँदा सम्बन्धित मन्त्रीहरू उपस्थित हुनु अनिवार्य हुनुपर्ने माग गरे।  

उनका अनुसार मन्त्रीहरूको अनुपस्थितिमा सांसदले उठाएका प्रश्नहरूको अर्थपूर्ण जवाफ नआउने भएकाले संसदीय बहस कमजोर बन्ने गरेको छ।

रोस्टममै उभिएका सांसद राईलाई सभामुख अर्यालले पटक–पटक बोल्न आग्रह गरे पनि उनले मन्त्रीहरूको उपस्थिति नभएसम्म नबोल्ने अडान लिए। उनले रोस्टम नछोड्ने चेतावनीसमेत दिएका थिए।

सांसदको अडान र कार्यवाही अवरुद्ध भएपछि सभामुख अर्यालले आजको प्रतिनिधि सभा बैठक १५ मिनेटका लागि स्थगित गरेका छन्।

घटनापछि संसदमा बजेट छलफल र मन्त्रीहरूको उपस्थिति सम्बन्धी विषय पुनः बहसमा आएको छ।