मेसीको ह्याट्रिकमा अर्जेन्टिनाको विजयी शुरुवात, अल्जेरिया ३–० ले पराजित

काठमाण्डौ । अर्जेन्टिनी कप्तान लियोनल मेसीको प्रेरणादायी प्रदर्शनमा अर्जेन्टिनाले फिफा विश्वकप–२०२६ मा विजयी शुरुवात गरेको छ।

कानसास सिटी स्टेडियममा सम्पन्न समूह ‘जे’ अन्तर्गतको खेलमा अर्जेन्टिनाले अल्जेरियालाई ३–० गोलअन्तरले पराजित गर्दै महत्वपूर्ण तीन अंक हात पारेको हो।

अर्जेन्टिनाको जितमा कप्तान मेसी एक्लैले ह्याट्रिक पूरा गरे। उनले खेलको १७औँ, ६०औँ र ७६औँ मिनेटमा गोल गर्दै टोलीलाई सहज जीत दिलाए।

खेलको १७औँ मिनेटमा पेनाल्टी क्षेत्र बाहिरबाट गरेको शक्तिशाली प्रहारमार्फत मेसीले अर्जेन्टिनालाई अग्रता दिलाएका थिए।  

त्यसपछि दोस्रो हाफमा थप दुई गोल गर्दै उनले विश्वकप करियरकै पहिलो ह्याट्रिक पूरा गरे।

यो ह्याट्रिकसँगै मेसीको विश्वकप गोल संख्या १६ पुगेको छ। 

उनले जर्मनीका मिरोस्लाभ क्लोजको नाममा रहेको विश्वकप इतिहासकै सर्वाधिक गोलको कीर्तिमान बराबरी गरेका छन्।

३८ वर्षको उमेरमा ह्याट्रिक गर्दै मेसी विश्वकपमा ह्याट्रिक गर्ने सबैभन्दा पाका खेलाडीसमेत बनेका छन्।

साथै, अल्जेरियाविरुद्ध मैदान उत्रिएसँगै मेसीले छैटौँ विश्वकप खेल्ने पहिलो फुटबलरको कीर्तिमान पनि आफ्नो नाममा लेखाएका छन्।  

सन् २००६ मा विश्वकप यात्रा सुरु गरेका मेसी अझै पनि अर्जेन्टिनाको उपाधि यात्राका प्रमुख आधारस्तम्भका रूपमा रहेका छन्।