स्वरोजगार लघुवित्तको १० हजार ९१३ कित्ता संस्थापक सेयर बिक्रीमा

काठमाण्डौ । स्वरोजगार लघुवित्त वित्तीय संस्था लिमिटेडले १० हजार ९१३ कित्ता संस्थापक सेयर बिक्री गर्ने भएको छ।

संस्थाका संस्थापक सेयरधनी नरेन्द्रराज पाण्डेले आफ्नो नाममा रहेको संस्थापक सेयर बिक्रीका लागि निवेदन दिएपछि लघुवित्तले बिक्री प्रक्रिया अगाडि बढाएको हो। सञ्चालक समितिको निर्णयअनुसार उक्त सेयर खरिदका लागि पहिलो प्राथमिकता संस्थाकै विद्यमान संस्थापक सेयरधनीलाई दिइएको छ।

नेपाल राष्ट्र बैंकको निर्देशनअनुसार संस्थापक समूहको सेयर बिक्री गर्दा विद्यमान संस्थापक सेयरधनीलाई प्राथमिकता दिनुपर्ने व्यवस्था छ। सोही व्यवस्थाबमोजिम लघुवित्तले इच्छुक संस्थापक सेयरधनीबाट आवेदन माग गरेको हो।

सेयर खरिद गर्न चाहने विद्यमान संस्थापक सेयरधनीले सूचना प्रकाशित भएको मितिले ३५ दिनभित्र आवश्यक कागजात संलग्न गरी आवेदन दिनुपर्नेछ। आवेदन लघुवित्तको बनेपा–५, काभ्रेपलाञ्चोकस्थित केन्द्रीय कार्यालयको प्रशासन विभागमा बुझाउन सकिनेछ।

आवेदन दिने अन्तिम दिन सार्वजनिक बिदा परेमा त्यसको भोलिपल्ट कार्यालय खुलेको दिनसम्म आवेदन दिन पाइने संस्थाले जनाएको छ।

तोकिएको समयभित्र विद्यमान संस्थापक सेयरधनीबाट आवेदन नपरेमा वा बिक्रीमा राखिएको सबै सेयर खरिद नभएमा प्रचलित कानुनअनुसार अन्य व्यक्ति तथा संस्थालाई बिक्री गर्ने प्रक्रिया अघि बढाइनेछ।