किड्स कप २०२६ को उपाधि लिटिल एन्जल्स स्कुललाई

 

काठमाण्डौ ।  लिटिल एन्जल्स स्कुलले काष्ठमण्डप विद्यालयलाई रोमाञ्चक फाइनल खेलमा ३–२ गोल अन्तरले पराजित गर्दै पहिलो संस्करणको ‘आईविबी किड्स कप २०२६’ को उपाधि जितेको छ।

आईविबी नेपालको आयोजनामा भएको प्रतियोगिताको फाइनल खेल १२ जुलाई २०२६ मा सम्पन्न भएको हो। प्रतिस्पर्धात्मक खेलमा लिटिल एन्जल्सले एक गोलको अग्रता जोगाउँदै उपाधि उचालेको हो। काष्ठमण्डप विद्यालय प्रथम उपविजेता बन्यो।

१० वर्षमुनिका बाल फुटबल खेलाडीलाई लक्षित गरी आयोजना गरिएको अन्तरविद्यालय प्रतियोगिता फिफा विश्वकपको अवधारणाबाट प्रेरित थियो। प्रतियोगितामा ज्ञानोदय बालबाटिका स्कुल, डीएभी स्कुल, दरबार हाई स्कुल, प्राइम ग्लोबल स्कुल, काष्ठमण्डप विद्यालय, लिटिल एन्जल्स स्कुल र क्याम्पियन स्कुलसहित आठ विद्यालयले फरक–फरक देशको प्रतिनिधित्व गर्दै प्रतिस्पर्धा गरेका थिए।

आयोजकका अनुसार प्रतियोगिताले बाल खेलाडीलाई प्रतिस्पर्धा, टिमवर्क, अनुशासन, खेल भावना र उत्साहले भरिएको ‘सानो विश्वकप’को अनुभव प्रदान गरेको थियो।

प्रतियोगितामा उत्कृष्ट प्रदर्शन गरेका खेलाडीलाई समापन समारोहमा व्यक्तिगत पुरस्कारसमेत प्रदान गरिएको थियो। लिटिल एन्जल्स स्कुलका आशुतोष पाण्डे प्रतियोगिताको सर्वोत्कृष्ट खेलाडी अर्थात् एमभीपी घोषित भए। काष्ठमण्डप विद्यालयका सम्राट विक्रम शाहले उत्कृष्ट गोलरक्षकको उपाधि पाए।

नेपाल खेलकुद पत्रकार मञ्चका अध्यक्ष निरञ्जन अधिकारीले विजेता टोलीलाई ट्रफी प्रदान गरेका थिए। मञ्चका प्रथम उपाध्यक्ष प्रज्वल ओलीले सर्वोत्कृष्ट खेलाडी र उत्कृष्ट गोलरक्षकसहित व्यक्तिगत विधाका विजेतालाई पुरस्कार हस्तान्तरण गरेका थिए।

समापन समारोहलाई सम्बोधन गर्दै अधिकारीले बालबालिका तथा ग्रासरुट खेलकुदमा गरिने लगानीले मुलुकको खेलकुद भविष्य निर्माण गर्न महत्त्वपूर्ण भूमिका खेल्ने बताए।

“हाम्रो देशका लागि यस्तो कार्यक्रम आवश्यक थियो। यो हाम्रो भविष्यको तयारी हो। यस्तो उत्कृष्ट कार्यक्रम आयोजना गरेकोमा म आईविबी नेपाललाई धन्यवाद दिन चाहन्छु,” उनले भने।

उनले प्रतियोगितामा सहभागी आठवटै टोलीका खेलाडीले देखाएको उत्साह, प्रतिभा र प्रतिस्पर्धात्मक भावनाको समेत प्रशंसा गरे।

प्रतियोगिता ९ जुलाई २०२६ मा औपचारिक रूपमा सुरु भएको थियो। उद्घाटन समारोहमा हवाई उड्डयनकर्मी तथा क्याप्टेन विजय लामा प्रमुख अतिथिका रूपमा सहभागी भएका थिए।

युवा खेलाडीलाई सम्बोधन गर्दै लामाले बालबालिकाले प्रदर्शन गरेको खेल भावना र प्रतिभाबाट आफू प्रभावित भएको बताएका थिए।

“यो अद्भुत कार्यक्रम हो। यी प्रतिभाशाली बालबालिकाले देखाएको खेल भावना देखेर म अत्यन्त प्रभावित भएको छु। उनीहरू हाम्रो भविष्य हुन्। एक दिन उनीहरूलाई फिफा विश्वकपमा खेलिरहेको देख्न पाउने आशा गरौँ,” उनले भने।

आयोजक आईविबी नेपालले प्रतियोगिताको उद्देश्य विजेता छनोट गर्नुमा मात्र सीमित नरहेको जनाएको छ। प्रतियोगिताले युवा खेलाडीलाई प्रतिस्पर्धा गर्ने, मित्रता निर्माण गर्ने, आत्मविश्वास बढाउने तथा टिमवर्क र निष्पक्ष खेलका मूल्यहरू सिक्ने अवसर प्रदान गरेको आयोजकको भनाइ छ।