सडक अवरुद्ध हुँदा हवाई उडानमा नयाँ रेकर्ड, एकैदिन साढे ५ सय उडान

काठमाण्डौ ।  त्रिभुवन अन्तर्राष्ट्रिय विमानस्थलमा हवाई उडानको नयाँ रेकर्ड कायम भएको छ । त्रिभुवन अन्तर्राष्ट्रिय विमानस्थलबाट सोमबार एक दिनमा साढे ५सय उडान भएका छन् । जुन एक दिनमा भएको हालसम्मकै उच्च उडान हो ।  

यो दिन आन्तरिक उडान र अन्तर्राष्ट्रिय उडान गरी  ५५९ उडान भएको विमानस्थलले जनाएको छ । 

सोमबार आन्तरिकतर्फ हेलिकप्टरसहित २२७ उडान (डिपार्चर) र २२१ अवतरण (अराइभल) भएका छन् । यस्तै अन्तर्राष्ट्रिय उडानतर्फ ५६ अवतरण र ५५ उडान भएका छन् ।

यसअघि गत वर्षको दशैंका बेला उच्च उडान चाप थियो । गत वर्ष  आन्तरिक र अन्तर्राष्ट्रियमा गरी दैनिक ५ सय हाराहारी उडान भएका थिए । 

असोज ११ र १२ गतेको अविरल वर्षाका कारण बाढीपहिरोले विभिन्न सडक सञ्जाल अवरुद्ध हुँदा हवाई चाप बढेको छ ।