ग्राउण्ड जिरोका लगानीकर्ताबीच दुई पुनर्बीमा कम्पनीको चर्चा, भन्छन् ‘ग्रे लिष्टका कारण सेयर बजार झनै बढ्नसक्छ ’

काठमाण्डौ । सधैंको साता जस्तै आज पनि हामीले नियमित स्तम्भ ‘ग्राउण्ड जिरो’लाई निरन्तरता दिएका छौं । आज हामीले कमलादी र ज्ञानेश्वरका केही ब्रोकर हाउसहरुमा पुगेर लगानीकर्ताहरुको बिचार सुन्ने र बुझ्ने प्रयास गरेका छौं । केही दिनदेखि सामाजिक सञ्जालहरुमा बजारको विषयमा लगानीकर्ताहरुबीच निकै अन्यौलता देखिन्थ्यो ।  खासगरि, अघिल्लो साता नेपाल एफएटीएफको ग्रे लिष्टमा परेपछि यसको प्रभाव सेयर बजारमा के कस्तो पर्छ ? भन्नेमा लगानीकर्ताहरुमा निकै उत्सुकता देखिन्थ्यो ।  

केहीले यसको प्रभाव शून्य हुने आँकलन गर्दै थिए भने केहीले ठूलै अंकले बजारमा गिरावट आउने सक्ने बताएका थिए । यस विषयमा सामाजिक सञ्जालहरुमा लगानीकर्ताहरुबीच चर्को बहस चलेको थियो । यही कारण आज दिनभर सेयर बजारमा तीव्र उतारचढाव देखिन्थ्यो । कारोबारको पहिलो सत्रमा झण्डै ५२ अंकले घटेको बजार अन्त्यमा दोहोरो अंकले सुधार आएर बन्द भयो ।  

यसै सिलसिलामा आज हामी बिहान ११ बज्दा नबज्दै सबैभन्दा पहिले सुमेरु सेक्यूरिटिज (स्टक ब्रोकर नम्बर ३९) मा पुगेका थियौं । आज बिहान बजार खुल्ने बित्तिकै बजारमा तीव्र गिरावट आएको थियो । नेप्सेमा करिब ५२ अंकको गिरावट आएको थियो । ब्रोकर हाउसमा लगानीकर्ताहरु पनि अत्तालिएका देखिन्थे । केही लगानीकर्ता आत्तिएर सेयर बेच्न दौडिएका थिए भने केहीले ग्रे लिष्टको प्रभाव धेरै समय नपर्ने भन्दै साथिहरुलाई सम्झाउदै गरेको पनि देखिन्थ्यो । बजार घट्दा कारोबार पनि बढेको थियो । यतिकैमा एक लगानीकर्ताले ब्रोकर हाउसमा साथिहरु नआएकोप्रति इंगित गर्दै ठट्यौली पारामा भने, ‘खै साथीहरु आएनन् । बजार ठूलो अंकले घट्यो, साथीहरु बाटैमा पल्टे कि के हो ?’उनीसँगै बसेका लगानीकर्ताले भने, ‘आउदै होलान् ।’

आज पहिलो प्रहरमा घटेको बजार बिस्तारै सम्हालिने प्रयास गर्दै थियो । यतिकैमा केही लगानीकर्ता नमस्कार है साथीहरु भन्दै ब्रोकर हाउस छिरे । लौ ! साथीहरु आफू त दीर्घकालिन लगानीकर्ता परियो । बजार जेसुकै होस् घटेर सेयर बेचिन्न । म त महाकुम्भमा गएर आएको । लौ प्रसाद लिनुहोस ।’ यति भनेर उनले आफ्ना सहपाठी लगानीकर्तालाई प्रसाद बाँडे ।  

उनीसँगै बसेका लगानीकर्ताले भने, ‘म पनि आज बजार बढोस् भनेर मन्दिर गएर आएको हो । हेरौ अन्तिमसम्म के हुन्छ ?’ ब्रोकर हाउसमा यस्तै गल्फति चल्दै थिए । भित्ताको घडिमा १२ बज्दै थियो । बजार बिस्तारै फर्कदै थियो ।  

यहाँबाट हामी नक्सालमा रहेको सनी सेक्यूरिटिज (स्टक ब्रोकर नम्बर ४२) मा पुग्यौं । यहाँ पनि लगानीकर्ताहरुको उपस्थिति राम्रै थियो । यहाँ भेटिएका केही लगानीकर्ताले नेपाल पुनर्बीमा र हिमालयन रिको चर्चा गरेको सुनियो । यसै ब्रोकरमा भेटिएका एक लगानीकर्ताले सोधे, ‘यी कम्पनीमा के छ र साथीहरु ? कुदेको कुदै गरेको देखिन्छ । बरु हिमालयन डिष्टिलरीको रिपोर्ट सुधार हुँदै गरेको देखिन्छ ।’ यहाँ भेटिएका लगानीकर्ताहरुमा पनि बजारप्रति केही अन्यौलता रहेको पाइन्थ्यो ।  

केही समयको बसाई पछि हामी कमलादीमा रहेको कोहिनूर सेक्यूरिटिज (स्टक ब्रोकर नम्बर ३५) मा पूग्यौं । यस बेलासम्म दिनको १ बजिसकेको थियो । बजारमा समान्य अंकले सुधार आउदै थियो । यहाँ भेटिएका एक लगानीकर्ताले आज बजारमा उतारचढाव हुन्ुमा नेपाल ‘ग्रे’ लिष्टमा परेको समचारनै मुख्य कारण रहेको बताए । उनले भने, ‘हेरौं आज बजार कस्तो हुन्छ ? यसै ब्रोकरमा हामीेले केही समय ब्रोकर सञ्चालकसँग पनि बजारको अवस्थाको विषयमा बुझने प्रयास गर्यौ । यस ब्रोकरका सञ्चालकले पनि ग्रे लिष्टले सेयर बजारमा खासै असर नपर्ने बताए । उनले आयात रोकिदा त्यो पैसा सेयर बजारमा आउन सक्ने आँकलन गरे ।  

यहाँबाट हामी मल्ल एण्ड मल्ल सेक्यूरिटिज (स्टक ब्रोकर नम्बर ११( मा पुग्यौं । यहाँ पनि लगानीकर्ताको उपस्थिति राम्रै थियो । भित्ताको घडिमा २ बज्दै गर्दा बजारमा सुधार हुँदै गरेको देखिन्थ्यो । यहाँ भेटिएका लगानीकर्ता भन्दै थिए, ‘आज  बजार बढेर बन्द भएमा यो ग्रे लिष्टको प्रभाव अन्त्य हुन्छ । भोलीबाट बाजर आफ्नै लयमा चल्छ ।