डा. विश्व पौडेलको हातमा राष्ट्र बैंकको बागडोर, को हुन् उनी ? (प्रोफाइलसहित)

काठमाण्डौ । कयौ साता लामो चलखेल, तानातान र छलछामपछि अन्ततः नेपाल राष्ट्र बैंकले १८ औं गभर्नर पाएको छ ।  

मंगलबार बालुवाटारमा बसेको मन्त्रिपरिषद बैठकले अर्थविद डा. विश्वनाथ पौडेललाई नेपाल राष्ट्र बैंकको १८ औं गभर्नरमा नियुक्तिको निर्णय गरेको हो ।  

एक मन्त्रीकाअनुसार गभर्नरमा पौडेलको नाममा सर्वसम्मति निर्णय भएको छ ।  

गभर्नर नियुक्तिको निर्णयअघि सिफारिस समितिले डा. पौडेलसहित डा. निलम ढुंगाना र पूर्वसचिव दिनेश भट्टराईको नाम सिफारिस गरेको थियो । सिफारिस गरिएका तीन नाममध्ये पहिलो नम्बरमा रहेका डा. पौडेललाई गभर्नर बनाइएको हो । 

पछिल्लो समय डा. पौडेललाई गभर्नर बनाउन प्रमुख सत्तारुढ दल नेकपा एमालेका अध्यक्ष तथा प्रधानमन्त्री केपी शर्मा ओली र कांगे्रेस सभापति शेरबहादुर देउवाबीच उच्चस्तरको राजनीतिक सहमति बनेको थियो । डा. पौडेल नै गभर्नर बन्ने निश्चित भइसके पनि आवश्यक प्रक्रिया पूरा गर्नका लागि मात्र आजको मन्त्रिपरिषद बसेर निर्णय गरिएको हो ।

नजिकबाट विश्व पौडेल

शैक्षिक पृष्ठभूमि: डा. विश्व पौडेलले अमेरिकाको युनिभर्सिटी अफ क्यालिफोर्निया (बर्क्ले) बाट कृषि तथा स्रोत अर्थशास्त्रमा विद्यावारिधि (Ph.D.) प्राप्त गरेका छन्।

व्यावसायिक अनुभव:

-काठमाडौं विश्वविद्यालय स्कुल अफ म्यानेजमेन्ट (KUSOM) मा भिजिटिङ एसोसिएट प्रोफेसर।

-अन्तर्राष्ट्रिय श्रम संगठन (ILO) मा आर्थिक सल्लाहकार।

-सानिमा बैंक लिमिटेडका पूर्व निर्देशक।

-मिलेनियम च्यालेन्ज नेपाल (MCA-Nepal) मा अर्थशास्त्री।

-विश्व बैंकमा परामर्शदाता (२०१२–२०१५)।

सरकारी भूमिका:

-२०७८ साउन १२ गते प्रधानमन्त्री शेरबहादुर देउवाको नेतृत्वमा राष्ट्रिय योजना आयोगको उपाध्यक्षमा नियुक्त भएका थिए ।

-गभर्नर सिफारिस समिति: २०८१ फागुन २६ गते गठित गभर्नर सिफारिस समितिमा अर्थविद् सदस्यको रूपमा नियुक्त । गभर्नर बन्ने भएपछि राजीनामा र आज गभर्नरमा नियुक्ति