सामाजिक सुरक्षा कोषमा योगदानको लागि ई–सेवा मनि ट्रान्सफर र टच एन गोको साझेदारी

काठमाण्डौ । नेपालको अग्रेणी डिजिटल रेमिट्यान्स सेवा प्रदायक ई–सेवा मनि ट्रान्सफरले ‘टच एन गो’ सँग सम्झौता गर्दै मलेसियामा बसोबास गर्ने नेपालीहरूलाई सामाजिक सुरक्षा कोषमा सहज रूपमा डिजिटल माध्यमबाट योगदान गर्न सक्ने व्यवस्था मिलाएको छ।

यस सम्झौता टीएनजीका प्रमुख कार्यकारी अधिकृत सर्भे स्वरेन राजा गोपाल र ई–सेवा मनि ट्रान्सफरका प्रमुख कार्यकारी अधिकृत अजेश कोईरालाबीच सम्पन्न सम्झौतामा ई–सेवा मनि ट्रान्सफर र टच एन गो ई–वालेटबीचको दीर्घकालीन सहकार्यको सम्भावना पनि प्रस्ट पारिएको छ। सम्झौताअनुसार अब मलेसियामा रहेका नेपालीहरूले टच एन गो ई–वालेटमार्फत सामाजिक सुरक्षा कोषमा सहज रूपमा योगदान गर्न सक्नेछन्।

Sponsored

Sponsored

टच एन गोका प्रमुख कार्यकारी अधिकृत सर्भे स्वरनले नेपालकै सबैभन्दा ठूलो फिनटेक कम्पनी एफवानसफ्टअन्तर्गतको पहिलो डिजिटल रेमिट्यान्स कम्पनी, ई–सेवा मनी ट्रान्सफरसँग साझेदारी गर्न पाउँदा खुशी व्यक्त गरे। उनले भने, ‘यो साझेदारी केवल रेमिट्यान्समा मात्र सीमित छैन, हामी एफवानसफ्टसँग आपसी वृद्धिका र नवीन प्रविधिमा आधारित सहकार्यका थुप्रै सम्भावनाहरूमा काम गरिरहेका छौँ। सामाजिक सुरक्षामा पहुँच विस्तार र डिजिटल समावेशितालाई प्रवर्धन गर्ने दिशामा यो पहल एक महत्वपूर्ण र दूरदर्शी कदम हो।’

ई–सेवा मनि ट्रान्सफरका प्रमुख कार्यकारी अधिकृत अजेश कोईरालाले भने,‘मलेसियामा बसोबास गर्ने नेपाली समुदायलाई सामाजिक सुरक्षा कोषमा सहज पहुँच प्रदान गर्न पाउँदा हामी अत्यन्तै हर्षित छौं। अब मलेसियामा रहेका हाम्रा दाजुभाइ तथा दिदीबहिनीहरूले एच एन गो एपमार्फत सहज रूपमा सामाजिक सुरक्षा कोषमा आफ्नो योगदान गर्न सक्नेछन्। यस साझेदारीले भुक्तानी प्रक्रियालाई थप सरल, पारदर्शी र प्रभावकारी बनाउनुका साथै प्रवासी नेपालीहरूको दीर्घकालीन वित्तीय सुरक्षामा पहुँच टेवा पुर्याउने छ भन्ने हाम्रो विश्वास छ।’