नेप्सेमा सामान्य अंकको सुधार, बजार साइडवेजमा चलेको विश्लेषकको ठहर

काठमाण्डौ । साताको तेस्रो कारोबार दिन आज नेपाल स्टक एक्सचेञ्च (नेप्से) परिसूचक सामान्य अंकले बढेको छ। आज नेप्से परिसूचक ०.१२ प्रतिशत अर्थात ३.२१ अंकले बढेर २ हजार ५६५.१६ विन्दुमा पुगेको बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.०४ प्रतिशतले घटेर ४४४.३७ विन्दुमा झरेको छ । यो दिन नेप्सेमा सूचीकृत मध्ये ३२७ वटा स्क्रिप्टको ७९ लाख ४७ हजार ५८ कित्ता सेयर ३ अर्ब ६२ करोड ६१ लाख रुपैयाँभन्दा बढीको कारोबार भएको  छ ।  

आजको बजारबारे अर्थशास्त्री सूर्यनारायण पौडेल भन्छन्, ‘पछिल्लो समय बजारमा जेनजी आन्दोलनपछिको राजनीतिक अन्योलताले लगानीकर्ताहरुमा ढुक्कसँग लगानी गर्ने अवस्था छैन । अहिलेको मार्केट साइडवेजमै चलिरहेको छ । अब यो भन्दा तल नजाला भन्ने आम लगानीकर्ताहरुको अपेक्षा छ । आगामी चुनावसम्म मार्केट २४८० र २६५० को रेञ्जमा रहेर साइडवेजमै चल्ने देखिन्छ ।’

साथै, चुनावअघि सेयरबजारलाई प्रभाव पार्ने खालको ब्याड न्युज आएमा बजार झनै घट्न सक्ने पौडेलको अनुमान छ । ‘चुनावसम्म बजार साइडवेजमै चल्ने देखिन्छ त्यसअघि बजारलाई प्रभाव पार्ने त्यस्ता नराम्रा समाचार आएमा बजार २४८० भन्दा तल जान सक्ने सम्भावना रहन्छ’ उनले भने, ‘अहिले लगानीकर्ताहरुलाई ढुक्कसँग लगानी गर्ने अवस्था पनि छैन । केही लगानीकर्ताहरुले थोरै नाफा बुक गरेर सेयर बेचे भने केहीले होल्ड गरेर बसेका छन् । बीचमा नयाँ लगानीकर्ताहरु बजारमा प्रवेश गरे भने बजार केही सम्हालिन सक्छ नत्र बजार साइडवेजमै छ ।’

साथै बैंक वित्तीय संस्थाहरुको रिपोर्ट पनि भनेजस्तो नआएकाले बजारलाई थप असर पारेको पौडेलले बताए ।

यो दिन नेप्सेमा सूचीकृत १३ वटा समूहमध्ये ७ वटामा हरियाली छायो भने अन्य ६ वटा समूहमा रातो पोतियो । आज हाईड्रो समूह सर्वाधिक अर्थात ०.७७ प्रतिशतले बढ्यो । यस्तै बैंकिङ समूह ०.०७ प्रतिशत, जीवन बीमा ०.५७, उत्पादन तथा प्रशोधन ०.३३, म्युचुअल फण्ड ०.२४, निर्जीवन बीमा ०.५० र व्यापार समूह ०.६९ प्रतिशतले बढे ।  

अन्य समूह आज सर्वाधिक अर्थात ०.६७ प्रतिशतले घट्यो । विकास बैंक समूह पनि आज ०.४७ प्रतिशत, फाइनान्स ०.६१, होटल ०.३८,लगानी ०.२९ र लघुवित्त समूह ०.०५ प्रतिशतले घट्यो ।    

धेरै कारोबार गर्ने कम्पनीहरु

यो दिन साहस उर्जाको सर्वाधिक सेयर कारोबार भयो । आज यो कम्पनीको ३५ करोड ५८ लाख बढीको कारोबार भयो । राधी विद्युतको कम्पनीको पनि आज ३२ करोड ३२ लाख, एनआरएन इन्फ्रास्ट्रक्चरको २६ करोड ७६ लाख, शिवम् सिमेन्टको १६ करोड ५ लाख र सिनर्जी पावरको ९ करोड ५३ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका पाँच वटा कम्पनीको सेयरमूल्यमा अपर सर्किट लाग्यो । आज साइन रेसुङ्गा डिबेञ्चर, बन्दीपुर केवलकार, माबिलुङ इनर्जी, सागर डिष्टिलरी र बुङ्गल हाईड्रोको सेयरमूल्यमा अपर सर्किट लाग्यो ।  

यो दिन दरमखोला हाईड्रोको सेयरमूल्य ६.८८, इष्टर्न हाईड्रोपावरको ६.२९ र स्वस्तिक लघुवित्तको सेयरमूल्य ४.०१ प्रतिशतले बढ्यो ।

सिटि होटल्सको सेयरमूल्य आज सर्वाधिक अर्थात ४.९६ प्रतिशतले घट्यो ।