सामान्य अंकले घट्यो नेप्से परिसूचक, विश्लेषक भन्छन्, ‘बजार एक्युमुलेसन फेजमा छ’

काठमाण्डौ । साताको पहिलाृ कारोबार दिन आज नेपाल स्टक एक्सचेञ्च (नेप्से) परिसूचक सामान्य अंकले घटेको छ। आज नेप्से परिसूचक ०.२० प्रतिशत अर्थात ५.१५ अंकले घटेर २ हजार ५४०.५७ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.३२ प्रतिशतले घटेर ४३९.४४ विन्दुमा झरेको छ । यो दिन नेप्सेमा सूचीकृत मध्ये ३३७ वटा स्क्रिप्टको ७९ लाख ५७ हजार ५६ कित्ता सेयर ३ अर्ब ८९ करोड ३९ लाख रुपैयाँभन्दा बढीको कारोबार भएको  छ ।  

आजको बजारबारे नेपाल सेयरधनी संघका अध्यक्ष घनश्याम पाण्डे भन्छन, ‘अहिलेको बजार एक्युमुलेसन फेजमा छ, लगानीकर्ताहरुमा कन्फिडेन्ट बढ्न सकिरहेको छैन । सबै कुरा सकारात्मक हुँदाका वाबजुत पनि बजार बढ्न नसक्नुको मुख्य कारण भनेको चुनावको अन्यौलता हो । बजार बढ्नुपर्ने थुप्रै आधारहरु रहेपनि लगानीकर्ताहरुले ढुक्कसँग लगानी गर्नसक्ने वातावरण बनेको छैन । अहिले सूचीकृत कम्पनीहरुले धमाधम लाभांश घोषणा गरेका छन् । बैंकहरुले मंसिर महिनाका लागि पनि ब्याजदर घटाएका छन् तर लगानीकर्ताको मनोबल बढ्न सकिरहेको छैन । यदि चुनावको टुंगो लाग्ने हो भने लगानीकर्तामा कन्फिडेन्ट बढेर मंसिरमा बजार बढ्न सक्ने देखिन्छ ।’

अर्का बजार जानकार दामोदर गजुरेल भन्छन्, ‘आजको बजार घट्नुपर्नेमा त्यस्तो कुनै ठोस कारण छैन । नेपाल बैंकले आज सार्वजनिक गरेको रिर्पोटमा नेपालको आर्थिक अवस्था तथा सूचकहरु राम्रै देखिएको छ । मुख्यगरी अहिले लगानीकर्तामा कन्फिडेन्ट आउन नसक्नुको मुख्य कारण भनेको चुनाव र आन्दोलनको अन्योलता हो । साथै जेनजी आन्दोलनका कारण सूचीकृत बैंक वित्तीय संस्था र बीमा कम्पनीहरुको रिपोर्ट पनि राम्रो आएन यसले बजार बढ्न नदिन मलम लगाउने काम गर्यो । यदि मंसिरमा केही समूहको आन्दोलन हुने हो भने निजी क्षेत्रलाई नै थप क्षति पुर्याउने देखिन्छ र बजार झन घट्न सक्ने देखिन्छ ।

यो दिन नेप्सेमा सूचीकृत १३ वटा समूहमध्ये ३ वटा बाहेक अन्य सबै समूहमा रातो पोतियो । आज होटल, उत्पादन तथा प्रशोधन र अन्य समूह मात्रै बढे। यी समूहहरु आज क्रमशः ०.१८, ०.०२ र ०.७२ प्रतिशतले बढे ।  

फाइनान्स समूह आज सर्वाधिक अर्थात ०.८७ प्रतिशतले घट्यो । बैंकिङ समूह पनि आज ०.३० प्रतिशत, विकास बैंक ०.५२, हाईड्रो ०.४९, लगानी ०.३४, जीवन बीमा ०.१२, लघुवित्त ०.३८ ,म्युचुअल फण्ड ०.१४, निर्जीवन ०.४९ र व्यापार समूह ०.१० प्रतिशतले घट्यो ।  

धेरै कारोबार गर्ने कम्पनीहरु

यो दिन एसबीआई डिबेञ्चर २०८९ को सर्वाधिक सेयर कारोबार भयो । आज यो बैंकको डिबेञ्चरको २८ करोड ९० लाख बढीको सेयर कारोबार भयो । नेपाल पुनर्बीमा कम्पनीको पनि आज २१ करोड ३५ लाख, माउन्टेन इनर्जीको २० करोड ८४ लाख, एनआरएन इन्फ्रास्ट्रक्चरको १८ करोड २२ लाख र युनियन हाईड्रोपावरको १६ करोड ६२ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज सागर डिष्टिलरी,बुङ्गल हाईड्रो, बन्दीपुर केवलकार र नबिल डिबेञ्चर २०८५ को सेयरमूल्यमा अपर सर्किट लाग्यो ।    

यस्तै झापा इनर्जीको सेयरमूल्य ६.०७ प्रतिशत, नेपाल माइक्रो इन्स्योरेन्सको ६.०१ र बोटलर्स नेपाल(तराई)को सेयरमूल्य ४.३५ प्रतिशतले बढ्यो ।  

यो दिन भूगोल इनर्जीको सेयरमूल्य सर्वाधिक अर्थात १० प्रतिशतले घट्यो । रुरु जलविद्युत परियोजनाको सेयरमूल्य पनि आज ९.५२ प्रतिशत,दरमखोला हाईड्रोको ६.०९ र पिपुल्स हाईड्रोपावरको सेयरमूल्य ५.२३ प्रतिशतले घट्यो ।