एन्ड्रोइड स्मार्टफोनप्रति चोरको वितृष्णाः लुटेको फोनपनि फिर्ता गर्दै, नजर आईफोनमा मात्रै

काठमाण्डौ । बजार र भीडभाड हुने ठाउँमा आफ्नो सामानको ख्याल राख्नुपर्छ भनिन्छ, नत्र चोरले चोर्छन तर अहिले सामानको मूल्य देखेर चोरले सामन चोरी गर्ने गरेको घटना बाहिर आएको छ ।  

हो, लन्डनमा फोन चोरीको अनौठो चलन देखिएको छ । यहाँ चोरहरूले सबै फोन चोरी गर्दैनन्। यदि तपाइँसँग सामसुङ वा अन्य कुनै कम्पनीको एन्ड्रोइड फोन छ भने चिन्ता लिनु पर्दैन। किनभने चोरहरूलाई यी फोनहरू चोर्न खासै चासो हुँदैन। चोरहरूले अन्य एन्ड्रोइड फोनहरू त्यागेर आईफोन मात्र चोरी गरिरहेका छन्।

यति मात्र होइन, भूलवश एन्ड्रोइड फोन फेला परे पनि फिर्ता गर्छन् । अन्तर्राष्ट्रिय बजारमा आइफोनको मूल्य निकै महँगो भएकाले यस्तो भएको हो । जसका कारण आइफोन चोर्नु मानिसका लागि लाभदायक बन्न पुगेको छ । लन्डन सेन्ट्रिकको पछिल्लो रिपोर्ट अनुसार चोरहरूले चोरेको एन्ड्रोइड फोन व्यक्तिलाई फिर्ता गरेका छन्।  

रिपोर्टका अनुसार लण्डनमा बस्ने साम नामका एक व्यक्तिले केही चोरहरूले उनलाई लुटेको र एकजना चोरले उनको फोन देखेपछि आफूहरुलाई सामसुङ नचाहिने भन्दै फोन फिर्ता गरेको बताए । यो घटना जनवरीमा भएको हो । ३२ वर्षीय साम रोयल मेल डिपो नजिकैबाट गइरहेका थिए । त्यसपछि आठजनाको गिरोहले उनीहरूलाई घेरेर कुटपिट गरी उनीहरूबाट सबै कुरा खोस्यो। उनीहरुले सैमको फोन, क्यामेरा र टोपी पनि लगे । भाग्दै गर्दा, एक लुटेराले पछाडि फर्केर सामलाई उनको एन्ड्रोइड फोन फिर्ता दिए।  

यस बाहेक अर्को एउटा घटना सार्वजनिक भएको छ, जसमा ई–बाइकमा सवार चोरले सामसुङ ग्यालेक्सी फोन खोसे तर केही समयपछि चोरले रोकिएर फोनको ब्रान्ड हेरे । त्यसपछि उसले रिसाएर फोन भुइँमा फ्याँक्यो र भाग्यो । यसले चोरहरूलाई सामसुङ जस्ता ठूला र महँगो ब्राण्डका एन्ड्रोइड स्मार्टफोन  नचाहेको स्पष्ट पारेको रिपोर्टमा जनाइएको छ । उनीहरु केवल आईफोनप्रति मात्रै आकर्षित देखिन्छन् ।  

सुरक्षा विज्ञहरूका अनुसार चोरहरूको यो छनौट पूर्णतया पैसाको कारण हो। विदेशमा आइफोनको मूल्य दोस्रो बजारमा एन्ड्रोइड मोडलभन्दा धेरै बढी छ। जसका कारण चोरहरुको ध्यान आइफोनमा बढी हुन्छ । यसको मतलब प्रत्येक आईफोन प्रयोगकर्ता चोरहरूको निशानामा छन्, जबकि एन्ड्रोइड प्रयोगकर्ताहरूले चोरहरूबाट केही राहत पाएका छन्।

यसको मतलब एन्ड्रोइड फोनहरू चोरी हुन सक्दैन भन्ने होइन। यसले प्राविधिक संसारमा पनि अपराधीहरूको तरिका परिवर्तन भइरहेको देखाउँछ। उनीहरू केवल उच्च नाफा हुने फोन प्राप्त गर्न चाहन्छन् ।